ភ្នំពេញ៖ ក្រសួងធនធានទឹក និងឧតុនិយម បានជូនដំណឹងពីការព្យាករអាកាសធាតុលើកទី២សម្រាប់រដូវប្រាំង និងដើមរដូវវស្សាចាប់ពីខែមីនា ដល់ខែឧសភាឆ្នាំ២០២៤។ នៅក្នុងរដូវប្រាំងឆ្នាំនេះ សីតុណ្ហភាពនៅទូទាំងប្រទេសនឹងឡើងខ្ពស់ជាងមធ្យមភាគច្រើនឆ្នាំ ដែលជាកត្ដាធ្វើឱ្យអាកាសធាតុក្ដៅ ហើយស្ងួត។
ក្រសួងបានបញ្ជាក់ថា បរិមាណទឹកភ្លៀងនឹងទាបជាងមធ្យមភាគច្រើនឆ្នាំ ហើយភ្លៀងកក់ខែធ្លាក់តិចតួច ដោយតិចជាងឆ្នាំ២០២៣ ជាមួយគ្នានឹងបាតុភូតផ្គររន្ទះ និងខ្យល់កន្ដ្រាក់ដែលកើតឡើងច្រើន។
សម្រាប់ដើមរដូវវស្សាឆ្នាំ២០២៤វិញ សីតុណ្ហភាពស្មើ ឬខ្ពស់ជាងមធ្យមភាគច្រើនឆ្នាំ។ បរិមាណទឹកភ្លៀងនឹងទាបជាងមធ្យមភាគច្រើនឆ្នាំ ហើយមិនសូវរាយប៉ាយ រួមជាមួយនឹងបាតុភូតផ្គររន្ទះ និងខ្យល់កន្ដ្រាក់កើតឡើងច្រើន។
ចំពោះបាតុភូតសកល យោងតាមការតាមដានទៅលើការពិនិត្យសង្កេត និងព្យាករស្ថានភាពវិវត្ដន៍នៃសីតុណ្ហភាពលើផ្ទៃសមុទ្រប៉ាស៊ីហ្វិកក្បែរអេក្វាទ័របង្ហាញថា ចាប់ពីខែមីនាដល់ខែមេសា ឆ្នាំ២០២៤ អត្រានៃបាតុភូតអែលនីណូ(El Nino)ខ្ពស់ជាង៧០ភាគរយ នៅបន្ដមានឥទ្ធិពលនៅលើតំបន់ជុំវិញមហាសមុទ្រប៉ាស៊ីហ្វិក។
ចាប់ពីខែឧសភា ឆ្នាំ២០២៤តទៅ អត្រានៃបាតុភូតអែលនីណូ នឹងថយចុះមកនៅត្រឹម២០ភាគរយ ដោយជំនួសមកវិញនូវស្ថានភាពអព្យាក្រឹត។
ដូច្នេះយោងលើការព្យាករអាកាសធាតុ ក្រសួងធនធានទឹក និងឧតុនិយម សូមជូនដំណឹងដល់ស្ថាប័នពាក់ព័ន្ធ អាជ្ញាធរដែនដី និងប្រជាពលរដ្ឋចូលរួមសហការប្រើប្រាស់ទឹកដោយសន្សំសំចៃក្នុងកម្រិតខ្ពស់ ជាពិសេសបណ្ដាជនបទដែលនៅឆ្ងាយពីប្រភពទឹក។
ជាមួយគ្នានេះ ក្រសួងអំពាវនាវឱ្យយកចិត្ដទុកដាក់ និងប្រុងប្រយ័ត្នចំពោះអាកាសធាតុក្ដៅហើយស្ងួត បាតុភូតផ្គររន្ទះ និងខ្យល់កន្ដ្រាក់ដែលអាចកើតមានច្រើននៅក្នុងខែមេសា និងខែឧសភា ឆ្នាំ២០២៤៕
