ភ្នំពេញ៖ លោក សុខ ឥសាន និងលោក ហេង ហាលីម ត្រូវបានរដ្ឋសភាបោះឆ្នោតជ្រើសតាំងជាសមាជិកព្រឹទ្ធសភា នីតិកាលទី៥ ក្នុងសម័យប្រជុំរដ្ឋសភាជាវិសាមញ្ញ នីតិកាលទី៧ ក្រោមអធិបតីភាពសម្តេច ឃួន សុដារី ប្រធានរដ្ឋសភា នៅព្រឹកថ្ងៃ១មីនានេះ។
ក្នុងចំណោមបេក្ខជន៤រូប លោក សុខ ឥសាន ទទួលបានសំឡេងគាំទ្រទាំង១១៣សំឡេងពីតំណាងរាស្ត្រក្នុងតំណែងដែលមានវត្តមាន ខណៈលោក ហេង ហាលីម ទទួលបានសន្លឹកឆ្នោតយល់ព្រមចំនួន១១២។ លោក អ៊ា ឃីម៉េង និងលោក ឌី ទេពកោសល្យ ទទួលបានត្រឹម២សំឡេងរៀងៗខ្លួនប៉ុណ្ណោះ។លោក សុខ ឥសាន និងលោក ហេង ហាលីម ក្លាយជាសមាជិក២រូបនៃព្រឹទ្ធសភា ដែលត្រូវបានជ្រើសរើសតាំងដោយរដ្ឋសភា តាមសំឡេងមតិភាគច្រើន ខណៈសមាជិក២រូបផ្សេងទៀតក្នុងត្រូវចាត់តាំងដោយព្រះមហាក្សត្រ។
គួរបញ្ជាក់ថា សមាជិកព្រឹទ្ធសភាមានសរុបចំនួន៦២រូបដោយកើតចេញពីការបោះឆ្នោត៥៨រូបកើតចេញពីការបោះឆ្នោតជ្រើសរើសដោយសមាជិករដ្ឋសភាចំនួន២រូប និង២រូបជ្រើសតាំងដោយព្រះមហាក្សត្រ។ លទ្ធផលនៃការបោះឆ្នោតកាលពីថ្ងៃទី២៥ ខែកុម្ភៈ បង្ហាញថា គណបក្សប្រជាជនកម្ពុជា ទទួលបាន៥៥អាសនៈ និងគណបក្សឆន្ទៈខ្មែរ បាន៣អាសនៈ៕
