វៀតណាម៖ ទីភ្នាក់ងារឧតុនិយមវៀតណាមបានប្រកាស នៅថ្ងៃទី ២៨ កុម្ភៈ ថាភាគខាងត្បូងប្រទេសវៀតណាមដែលជាតំបន់យុទ្ធសាស្ត្រសម្រាប់ដាំដុះស្រូវ កំពុងរងការវាយប្រហារពីរលកកម្តៅខ្លាំងហួសហេតុខុសប្រក្រតី។ ការកើនឡើងកម្តៅនេះបានធ្វើឲ្យកសិករវៀតណាមកំពុងជួបការលំបាកនៃភាពរាំងស្ងួត និងការដឹកជញ្ជូនដំណាំរបស់ពួកគេ ដោយសារកម្រិតទឹកទាបនៅក្នុងប្រឡាយតាមតំបន់។
មន្ត្រីឧតុនិយម បានឲ្យដឹងថា ក្នុងរយៈពេលដែលកំដៅកើនឡើងខ្លាំង បានចាប់ផ្តើមកាលពីថ្ងៃទី ៩ ខែកុម្ភៈ ដោយសីតុណ្ហភាពឡើងដល់ ៣៨ អង្សារសេ ដែលខ្ពស់មិនធ្លាប់មាន សម្រាប់ខែកុម្ភៈនៅភាគខាងត្បូងប្រទេសវៀតណាម។ ហើយគេរំពឹងអាកាសធាតុអាចកើនឡើងក្តៅខ្លាំងបន្ថែមទៀត រហូតដល់ ៣៩ អង្សារសេក្នុងខែមេសា និងឧសភា។
គួរបញ្ជាក់ថាតំបន់ភាគខាងត្បូងប្រទេសវៀតណាម តែងតែមានអាកាសធាតុក្តៅខ្លាំងបំផុត នៅខែមេសា ឬនៅខែឧសភា ដោយសីតុណ្ហភាពអាចឡើងដល់៣៩អង្សា។ នៅឆ្នាំ២០២៤នេះ រលកកម្តៅបានឡើងខ្ពស់ខ្លាំងមុនរដូវ ហើយអូសបន្លាយពេលយូរខែទៀត និងមានលក្ខណៈក្តៅខ្លាំងជាមួយសីតុណ្ហភាពពី ៣៧-៣៨អង្សា។ អាកាសធាតុក្តៅចម្លែកខុសធម្មតា និងអាចធ្វើឲ្យរងនូវផលប៉ះពាល់ទូទៅនៃការប្រែប្រួលអាកាសធាតុពិភពលោក។ អ្នកវិទ្យាសាស្ត្របានព្រមានថា អាកាសធាតុកំពុងកើនឡើងកម្ដៅខ្លាំង ដោយសារការកើនឡើងកម្ដៅនៃផែនដី៕
