កំពត៖ព្រះសង្ឃ និង ពុទ្ធបរិស័ទ និមន្ត អញ្ជើញមកពី២៥រាជធានីខេត្ត/នឹងរៀបចំ«ពិធីបុណ្យផ្ការស្មីសាមគ្គីជាតិ»មួយនៅលើកំពូលភ្នំបូកគោក្នុងខេត្តកំពត ដើម្បីប្រមូលបច្ច័យចូលរួមកសាងព្រះពុទ្ធប្បដិមាកម្ពស់១០៨ម៉ែត្រ នៅលើខ្នងភ្នំបូកគោ។ពិធីបុណ្យផ្ការស្មីសាមគ្គីជាតិនេះ នឹងប្រារព្ធធ្វើរយៈពេល៣ថ្ងៃ គឺចាប់ពី ថ្ងៃទី០១ ដល់ថ្ងៃទី០៣ ខែមីនា ឆ្នាំ២០២៤។
ពិធីបុណ្យផ្ការស្មីសាមគ្គីជាតិនេះ គឺរៀបចំប្រារព្ធឡើងដោយ សម្តេចព្រះអគ្គមហាសង្ឃរាជាធិបតី សម្តេចព្រះសង្ឃនាយក សម្តេចព្រះសង្ឃនាយករង ព្រះមេគណរាជធានី ខេត្ត រួមគ្នាជាមួយអ្នកឧកញ៉ា សុខ គង់ ព្រមទាំងពុទ្ធបរិស័ទជិតឆ្ងាយទាំងក្នុង និងក្រៅប្រទេស។ជាពិធីបុណ្យ ដើម្បីប្រមូលបច្ច័យសាងសង់ព្រះពុទ្ធប្បដិមាកម្ពស់ ១០៨ម៉ែត្រ និង ព្រះពុទ្ធប្បដិមាអង្គតូចចំនួន ៨៤,០០០ អង្គ នៅលើខ្នងភ្នំបូកគោ ក្នុងឧទ្យានជាតិព្រះមុនីវង្ស បូកគោ ខេត្តកំពត ។
បើតាមសេចក្តីប្រកាសព័ត៌មាន ពិធីបុណ្យផ្ការស្មីសាមគ្គីជាតិ ថ្ងៃទី១ ត្រូវនឹងថ្ងៃទី០១ ខែមីនា នឹងជួបជុំពុទ្ធបរិស័ទជិតឆ្ងាយ ធ្វើបទនមស្ការព្រះរតនត្រ័យ សមាទានសីល និង និមន្តព្រះសង្ឃ ចម្រើនព្រះបរិត្ត ស្ថិតនៅការដ្ឋានសាងសង់ព្រះពុទ្ធប្បដិមាកម្ពស់ ១០៨ម៉ែត្រតំបន់វាល ស្រែ៥០០ លើខ្នងភ្នំបូកគោ ហើយពេលរាត្រី ក្រុមសិល្បៈល្ខោនបាសាក់អប្សរាសម្តែងជូនទស្សនាទល់ភ្លឺនៅមុខសណ្ឋាគារ ឋានសួគ៌ សុខា (លើភ្នំបូកគោ)។
ថ្ងៃទី២ម៉ោង៣ និង ៣០នាទីរសៀលនឹងមានការជួបជុំពុទ្ធបរិស័ទជិតឆ្ងាយ ធ្វើបទនមស្ការព្រះរតនត្រ័យ សមាទានសីល និងនិមន្តព្រះសង្ឃចម្រើនព្រះបរិត្ត បន្ទាប់មកសម្តេចព្រះព្រហ្មរតនមុនី ពិន សែម សមាជិកថេរសភាពុទ្ធសាសនានៃព្រះរាជាណាចក្រកម្ពុជា សម្តែងធម្មទេសនា នៅការដ្ឋានសាងសង់ព្រះពុទ្ធប្បដិមាកម្ពស់១០៨ម៉ែត្រ លើខ្នងភ្នំបូកគោ។ ពិធីនេះប្រព្រឹត្តទៅក្រោមព្រះអធិបតីភាព សម្តេចព្រះពោធិវ័ង្ស អំ លីមហេង។នៅពេលរាត្រី ក្រុមសិល្បៈល្ខោនបាសាក់អប្សរាសម្តែងជូនទស្សនាទល់ភ្លឺនៅមុខសណ្ឋាគារ ឋានសួគ៌ សុខា (លើភ្នំបូកគោ)។
ថ្ងៃទី៣ត្រូវនឹងថ្ងៃទី០៣ ខែមីនាម៉ោង៨ព្រឹក ពិធីរាប់បាត្រ ព្រះសង្ឃ ១,០០០ អង្គ ស្ថិតនៅការដ្ឋានសាងសង់ព្រះពុទ្ធប្បដិមាកម្ពស់ ១០៨ម៉ែត្រ តំបន់វាលស្រែ៥០០ លើខ្នងភ្នំបូកគោ។
ដើម្បីបានចូលរួមចំណែកជ្រះថ្លា ក្នុងការកសាងព្រះពុទ្ធប្បដិមាកម្ពស់១០៨ម៉ែត្រនេះ ពុទ្ធបរិស័ទអាចមានឱកាស ចាប់យកកុសលផលបុណ្យ ចូលរួមភ្ជាប់និស្ស័យកសាងព្រះពុទ្ធអង្គធំនេះ ដោយសទ្ធាជ្រះថ្លា ជាពិសេសពុទ្ធបរិស័ទទាំងអស់ អាចចាប់មគ្គផលកុសលផលបុណ្យជាវព្រះអង្គតូចៗ ដែលមានទំហំកម្ពស់០.៣១ម៉ែត្រ បណ្តោយ ០.២៥ម៉ែត្រ និង ទទឹង០.១៦៥ម៉ែត្រ មាន៤ថ្នាក់៩ជាន់ ហើយអាចចារឹកឈ្មោះផ្ទាល់ខ្លួន ឈ្មោះអ្នកមានគុណ លោកតាលោកយាយ កូន ក្មួយ ដើម្បីទទួលបានកុសលផលបុណ្យផងដែរ ហើយដំកល់ទុកនៅក្នុងខឿនក្រោមព្រះអង្គធំ ទុកជាប្រវត្តិសាស្ត្រយូរអង្វែង តគ្រប់ជំនាន់ដល់កូន ចៅ ជំនាន់ក្រោយបានគោរពជាទីសក្ការៈ។
អ្នកឧកញ៉ាបណ្ឌិតសុខ គង់ មានចក្ខុវិស័យ និងសទ្ធាជ្រះថ្លាមុតមាំ ក្នុងការកសាងព្រះពុទ្ធប្បដិមា កម្ពស់១០៨ម៉ែត្រនេះ ដែលមានព្រះពុទ្ធប្បដិមាអង្គធំ និងព្រះពុទ្ធរូបតូចៗ ដើម្បីបានឧទ្ទិសកុសលផលបុណ្យ ដែលយើងបានធ្វើមិនថាក្នុងជាតិនេះ រឺគ្រប់ៗជាតិណាឡើយ និងដើម្បីការរក្សានូវអត្តសញ្ញាណជាតិ នៃវប្បធម៌សាសនា ដោយឈរលើមូលដ្ឋានរក្សាចាស់ បង្កើតថ្មី នាសម័យតេជោសន្តិភាព និងការអភិវឌ្ឍ៕
