![](https://cdn.cc-times.com/kh.cc-times.com/media/44572/large/DF657276-3B0C-43A5-9773-20A27A7.jpeg?1708416109)
កំពង់ឆ្នាំង៖ ស្រុកកំពង់ត្រឡាច ខេត្តកំពង់ឆ្នាំង ក្លាយជាតំបន់សក្តានុពលដ៏ទាក់ទាញសម្រាប់ភ្ញៀវទេសចរបរទេស។ ស្ទើរតែរៀងរាល់ថ្ងៃតែងមានក្រុមភ្ញៀវទេសចរបរទេសធ្វើដំណើរតាមកប៉ាល់ និងរថយន្តក្រុងធំៗចូលមក ដើម្បីជិះរទេះគោដើរកម្សាន្តកាត់តាមទីជនបទរបស់ស្រុក និងជាពិសេសចូលទស្សនាគំនូរបុរាណ និងព្រះវិហារវត្តពោធិ៍រុក្ខារាមដែលជាសម្បត្តិបេតិកភណ្ឌជាតិមួយ មានអាយុកាលប្រមាណជាង១០០ឆ្នាំហើយ។
បើតាមក្រសួងព័ត៌មាន ព្រះវិហារវត្តពោធិ៍រុក្ខារាម នៅក្នុងវត្តពោធិ៍រុក្ខារាម ឬហៅវត្តចាស់ គឺជាវត្តដែលមានវ័យចំណាស់ ជាងគេមួយនៅកម្ពុជា ហើយអ្វីដែលពិសេសនោះ គឺមានផ្ទាំងគំនូរបុរាណពីសម័យលង្វែក ដែលបន្សល់ទុក ជាស្នាដៃមរតកវប្បធម៌ដ៏មានតម្លៃរបស់បុព្វបុរសខ្មែរ។ វត្តពោធិ៍រុក្ខារាមឬហៅវត្តចាស់ស្ថិតនៅក្នុងឃុំកំពង់ត្រឡាច ស្រុកកំពង់ត្រឡាច គឺមានទីតាំង ប្រហែល៣គីឡូម៉ែត្រពីមាត់ទន្លេ ដូច្នេះទើបមានសក្តានុពលខ្លាំងសម្រាប់ទេចរបរទេស ដែលជិះរទេះគោ ពីមាត់ទន្លេ មកទស្សនានូវគំនូរ ដែលវិចិត្រករខ្មែរគូរដោយដៃ និងលាបពណ៌ដោយជ័រធម្មជាតិខ្មែរសុទ្ធសាធ។
វត្តពោធិ៍រុក្ខារាម ជាទីសក្ការៈបូជា បន់ស្រន់សុំសេចក្តីសុខ និងជាតំបន់ទេសចរណ៍ ប្រវត្តិសាស្រ្ត ដែលមានភ្ញៀវទេសចរមកលេងស្ទើរគ្រប់រដូវកាល ជាពិសេសនៅរដូវវិសម្សកាលរបស់ជនបរទេស ដែលភ្ញៀវទេសចរទាំងនោះខ្លះមកតាមរថយន្ត ខ្លះមកតាមកប៉ាល់ឈប់ចតនៅដៃទន្លេសាប បន្ទាប់មកនាំគ្នាជិះរទេះគោកម្សាន្តនិងទស្សនាទិដ្ឋភាពវាលស្រែ និងមកទស្សនារូបគំនូរនៅលើជញ្ជាំង ព្រះវិហារវត្តពោធិ៍រុក្ខារាម ដែលមានរូបគំនូរបុរាណ គូរតាំងពីសម័យមុន មានទឹកថ្នាំជាប់បានយូរ និងមាន អាយុកាលចាស់ជាងគេ ជាង ៤០០ឆ្នាំហើយ។
![](https://cdn.cc-times.com/kh.cc-times.com/media/44573/large/3A992ED0-B67A-48C1-AE6B-4F5E100.jpeg?1708416131)
![](https://cdn.cc-times.com/kh.cc-times.com/media/44574/large/A184126A-41E2-4669-8D0E-33DB25C.jpeg?1708416131)
![](https://cdn.cc-times.com/kh.cc-times.com/media/44575/large/654BECF6-13F7-4A39-867C-6DD4F0B.jpeg?1708416139)