ភ្នំពេញ៖ ក្រសួងបរិស្ថានកម្ពុជា បានត្រៀមរៀបចំបំពាក់ម៉ាស៊ីនថតចំនួន ៤១០គ្រឿងបន្ថែមទៀត នៅក្នុងព្រៃនៃតំបន់អភិរក្សជួរភ្នំក្រវាញ ដើម្បីតាមដានសកម្មភាពសត្វព្រៃ និង បម្លាស់ទីរបស់ពួកគេ ព្រមទាំងជាផ្នែកមួយនៃការការពារ និង អភិរក្សសត្វព្រៃ។ការបំពាក់នេះ គឺតម្រូវឱ្យមានម៉ាស៊ីនថតចំនួនមួយ ក្នុងមួយគីឡូម៉ែត្រ ហើយការដាក់នេះធ្វើឡើងរយៈពេល ៣ខែ ក្នុងរដូវប្រាំង និងរដូវវស្សា ដែលអាចវិភាគបាននូវប្រភេទសត្វជាអាហារសម្រាប់ស្តារសត្វខ្លាធំបាន។
លោក អ៊ាង សុផល្លែត រដ្ឋមន្ត្រីក្រសួងបរិស្ថាន បានពន្យល់ថា បំពាក់ម៉ាស៊ីនថតសកម្មភាពសត្វព្រៃនេះ នឹងផ្តល់នូវទិន្នន័យជាក់លាក់របស់ធនធានសត្វព្រៃ តើអាចគ្រប់គ្រាន់សម្រាប់សត្វខ្លាធំ។ជួយអ្នកអភិរក្សក្នុងការរៀបចំផែនការដើម្បីស្តារសត្វខ្លាធំ ក្នុងលក្ខខណ្ឌមិនមានសត្វព្រៃជាចំណីគ្រប់គ្រាន់ តើត្រូវបង្កាត់ពូជសត្វព្រៃបន្ថែម ឬផ្តល់សត្វគោ ឬក្របីស្រុកជំនួស។ សិក្សាពីដង់ស៊ីតេសត្វព្រៃដែលជាចំណីរបស់សត្វខ្លាធំ និង សិក្សាពីរបាយនិងភាពសំបូររបស់សត្វព្រៃដែលជាចំណីរបស់សត្វខ្លាធំ។
គួរបញ្ជាក់ថា កន្លងមក ក្រសួងបរិស្ថាន បានសហការជាមួយអង្គការដៃគូ Wildlife Alliance, Conservation International, Fauna & Flora International និង គម្រោង Cambodia Sustainable Landscape & Ecotourism Project បានចុះសិក្សា បានប្រមាណ ៣៨២ ម៉ាស៊ីនថតស្វ័យប្រវត្ត ក្នុងឧទ្យានជាតិជួរភ្នំក្រវាញ តែចំនួនពិតប្រាកដអាចច្រើនជាងនេះ ព្រោះបើតាមយោងតាមទិន្នន័យគិតចាប់ពីឆ្នាំ២០១៩ ដល់ឆ្នាំ២០២៣ ដើម្បីសិក្សាវត្តមាននិងអវត្តមានសត្វព្រៃដែលមានដោយកម្រនិងជិតផុតពូជ ក្នុងគោលបំណងរៀបចំកំណត់តំបន់គ្រប់គ្រង និង ផែនការគ្រប់គ្រង និងសិក្សាពីដង់ស៊ីតេសត្វព្រៃដែលជាចំណីរបស់សត្វខ្លាធំ។
