ភ្នំពេញ៖ រដ្ឋមន្ត្រីក្រសួងបរិស្ថាន លោក អ៊ាង សុផល្លែត នៅថ្ងៃទី២៩មករានេះ បានប្រកាសជំរុញនូវការអនុវត្តវិធានការច្បាប់ ១០០ ភាគរយ លើរាល់បទល្មើសធនធានធម្មជាតិឱ្យខាងតែបាន និងមិនត្រូវមានជាដាច់ខាតនូវ វប្បធម៌ធ្វើកិច្ចសន្យាហើយដោះលែងជនល្មើស។ ការប្រកាសនេះធ្វើឡើងបន្ទាប់ពីសង្កេតឃើញថា នៅមានការខ្វះចន្លោះខ្លះៗ ពីការអនុវត្តវិធានការច្បាប់ ជាក់ស្តែងដូចជាករណីបទល្មើសកូនដំរីព្រៃមួយក្បាលដែលត្រូវគេបាញ់សម្លាប់នៅខេត្តមណ្ឌលគិរី កាលពីថ្មីៗនេះ។
បើតាមសេចក្តីប្រកាសរបស់ក្រសួងបរិស្ថាន បានឲ្យដឹងថា ក្នុងរយៈពេល បន្ទាប់ពីមានការណែនាំរបស់ លោករដ្ឋមន្រ្តីក្រសួង បានសង្កេតឃើញថា នៅមានការខ្វះចន្លោះខ្លះៗ ពីការអនុវត្តវិធានការច្បាប់ ១០០ ភាគរយ លើរាល់បទល្មើសធនធានធម្មជាតិ។ ដូចនេះ ក្រសួងបានធ្វើការ ក្រើនរម្លឹកសារជាថ្មីដល់មន្ទីរបរិស្ថានរាជធានី ខេត្តទាំងអស់ ត្រូវយកចិត្តទុកដាក់ក្នុងការអនុវត្តវិធានការច្បាប់ ១០០ ភាគរយ លើរាល់បទល្មើសធនធានធម្មជាតិឱ្យខាងតែបាន និងមិនត្រូវមានជាដាច់ខាតនូវ វប្បធម៌ធ្វើកិច្ចសន្យាហើយដោះលែងជនល្មើស។
សូមជម្រាបថា ទាក់ទងនឹងករណីបទល្មើសកូនដំរីព្រៃមួយក្បាលដែលត្រូវគេបាញ់សម្លាប់នៅខេត្តមណ្ឌលគិរី កាលពីថ្មីៗនេះ ក្រសួងបរិស្ថាន បានថ្កោលទោសចំពោះជនប្រព្រឹត្តល្មើសច្បាប់ស្តីពីតំបន់ការពារធម្មជាតិ។ ក្រសួងបរិស្ថានបានអំពាវនាវដល់សមត្ថកិច្ច ភាគីពាក់ព័ន្ធ និងប្រជាពលរដ្ឋចូលរួមស្វែងរកវត្ថុតាង និងចាប់ជនល្មើសមកកាត់ទោសតាមនីតិវិធីនៃច្បាប់៕
