ភ្នំពេញ៖ គម្រោងសាងសង់«ស្ពានអាកាសព្រះមុនីវង្សថ្មី» ដែលស្ថិតនៅចំណុចប្រសព្វរវាងមហាវិថីព្រះមុនីវង្ស, មហាវិថីសម្តេចតេជោ ហ៊ុន សែន និង មហាវិថីយោធពលខេមរភូមិន្ទ (ផ្លូវ២៧១) ត្រូវបានចាក់មុខដំណរភ្ជាប់គ្នាជាផ្លូវការហើយ នៅថ្ងៃទី២៩ ខែមករា ឆ្នាំ២០២៤នេះ។តាមផែនការក្នុងដំណាក់កាលទី១ «ស្ពានអាកាសព្រះមុនីវង្សថ្មី»នឹងត្រូវបញ្ចប់នៅមុខចូលឆ្នាំថ្មីប្រពៃណីជាតិខ្មែរ។
ពិធីភ្ជាប់ស្ពាននេះ ត្រូវបានរៀបចំឡើងក្រោមវត្តមានរបស់លោក ឃួង ស្រេង អភិបាលរាជធានីភ្នំពេញ និងអ្នកឧកញ៉ា ពុង ឃាវសែ ប្រធានក្រុមហ៊ុន អូស៊ីអាយស៊ី (OCIC) ក៏ដូចជាភាគីពាក់ព័ន្ធជាច្រើនទៀត។
បច្ចុប្បន្ន ក្នុងដំណាក់កាលទី១ ការសាងសង់ស្ពានអាកាសព្រះមុនីវង្សថ្មី (ស្ពានអាកាសជាន់ទី២) សាងសង់បានសម្រេចប្រមាណ ៨០% ហើយតាមផែនការគ្រោងនឹងត្រូវបញ្ចប់នៅចុងខែមីនា ឆ្នាំ២០២៤ ខាងមុខនេះ។ ចំណែកដំណាក់កាលទី២ គ្រោងនឹងបញ្ចប់មុនចូលឆ្នាំប្រពៃណីជាតិ ឆ្នាំ២០២៥។
គួរបញ្ជាក់ថា ក្រុមហ៊ុន OCIC កំពុងសាងសង់ ស្ពានអាកាសព្រះមុនីវង្ស ដែលស្ថិតនៅចំណុចប្រសព្វគ្នារវាង មហាវិថីសម្ដេចតេជោ ហ៊ុន សែន, មហាវិថីព្រះមុនីវង្ស និងវិថីកងយោធពលខេមរភូមិន្ទ (ផ្លូវលេខ២៧១) ក្នុងខណ្ឌចំការមន និងខណ្ឌមានជ័យ។ ស្ពានអាកាសនេះ ចំណាយថវិកាជាង៣៦លានដុល្លារ និងចំណាយពេលសាងសង់ប្រមាណ៣ឆ្នាំ៕
