ប៉េកាំង៖អ្នកការទូតកំពូលរបស់ចិនលោក Wang Yi នឹងពិភាក្សាអំពីបញ្ហាកោះតៃវ៉ាន់ជាមួយទីប្រឹក្សាសន្តិសុខជាតិអាម៉េរិក លោក Jake Sullivan ក្នុងកិច្ចពិភាក្សាក្នុងប្រទេសថៃក្នុងសប្តាហ៍នេះ។ ការពិភាក្សានេះធ្វើឡើងក្នុងដំណើរទស្សនកិច្ចលោកវ៉ាងយីទៅប្រទេសថៃតបតាមការអញ្ជើញរបស់លោក Parnpree Bahiddha-Nukara ឧបនាយករដ្ឋមន្ត្រី និងជារដ្ឋមន្ត្រីការបរទេសថៃ។
បើតាមអ្នកនាំពាក្យក្រសួងការបរទេសចិន លោក Wang Wenbin បានឲ្យដឹងថា "លោក Wang Yi នឹងបញ្ជាក់ពីជំហររបស់ប្រទេសចិនលើទំនាក់ទំនងចិន-អាម៉េរិក តៃវ៉ាន់ និងបញ្ហាផ្សេងទៀត ហើយនឹងផ្លាស់ប្តូរទស្សនៈជាមួយសហរដ្ឋអាម៉េរិកលើបញ្ហាអន្តរជាតិ និងតំបន់ដែលមានការព្រួយបារម្ភរួមគ្នា" ។ លោក Wang នឹងជួបលោក Sullivan នៅរដ្ឋធានីថៃ ហើយនឹងស្នាក់នៅក្នុងប្រទេសថៃរហូតដល់ថ្ងៃច័ន្ទ ។សហរដ្ឋអាម៉េរិកបាននិយាយថា ការចរចានឹងធ្វើឡើងនៅថ្ងៃសុក្រ និងថ្ងៃសៅរ៍។
សេតវិមានបានឲ្យដឹងថា លោក Sullivan បានជួបជាមួយនាយករដ្ឋមន្ត្រីថៃ លោក Srettha Thavisin និងមន្ត្រីកំពូលផ្សេងទៀតនៅទីក្រុងបាងកក។សេតវិមានបាននិយាយថា ពួកគេបានពិភាក្សាអំពី "បញ្ហាក្នុងតំបន់ និងពិភពលោក រួមទាំងកិច្ចខិតខំប្រឹងប្រែងដើម្បីដោះស្រាយវិបត្តិកាន់តែអាក្រក់នៅក្នុងប្រទេសភូមា" ដែលជាកន្លែងដែលការប្រយុទ្ធគ្នាបានផ្ទុះឡើងរវាងរបបយោធាមីយ៉ាន់ម៉ា និងក្រុមប្រដាប់អាវុធជនជាតិភាគតិចនៅភាគខាងជើងនៃប្រទេសមីយ៉ាន់ម៉ា។
គួរបញ្ចាក់ថាទីក្រុងប៉េកាំង និងទីក្រុងវ៉ាស៊ីនតោន បានប៉ះទង្គិចគ្នាក្នុងប៉ុន្មានឆ្នាំថ្មីៗនេះ លើបញ្ហា សំខាន់ៗចាប់តាំងពីបច្ចេកវិទ្យា និងពាណិជ្ជកម្មដល់សិទ្ធិមនុស្ស ក៏ដូចជាបញ្ហាជម្លោះនៃកោះតៃវ៉ាន់និងការទាមទារប្រកួតប្រជែងនៅក្នុងសមុទ្រចិនខាងត្បូង៕
