ភ្នំពេញ៖រាជរដ្ឋាភិបាលកម្ពុជា បានចេញសេចក្ដីសម្រេច ស្ដីពីការបង្កើត«ក្រុមគ្រូពេទ្យ»ថែទាំ ព្រះរាជសុខភាពថ្វាយព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា និង សម្ដេចព្រះមហាក្សត្រី នរោត្ដម មុនីនាថ សីហនុ ព្រះវររាជមាតាជាតិខ្មែរ។
យោងតាមសេចក្តីសម្រេចក្រុមគ្រូពេទ្យថែទាំព្រះរាជសុខភាពព្រះមហាក្សត្រ និងព្រះមហាក្សត្រី រួមមាន លោក ឈាង រ៉ា រដ្ឋមន្ត្រីក្រសួងសុខាភិបាលកម្ពុជា , លោកគង់ សន្យា អគ្គនាយកមន្ទីរពេទ្យកាល់ម៉ែត លោកវេជ្ជបណ្ឌិត ឈួយ ម៉េង រួមនឹងវេជ្ជបណ្ឌិតជំនាញៗ នៅក្នុងស្ថាប័នសុខាភិបាលសាធារណៈផ្សេងទៀតជាសមាជិក។
បើតាមសេចក្តីសម្រេច ក្រុមគ្រូពេទ្យហ្លួងនេះ មានភារកិច្ចទទួលខុសត្រូវក្នុងការពិនិត្យ និងពិគ្រោះយោបល់ ព្យាបាល និងថែទាំព្រះរាជសុខភាពថ្វាយព្រះមហាក្សត្រ និង សម្តេចព្រះមហាក្សត្រី និង មានសិទ្ធិអញ្ជើញអ្នកជំនាញវេជ្ជសាស្ត្រ និង អមវេជ្ជសាស្ត្រនានា ចូលរួមជួយការងារក្នុងករណីចាំបាច់។
ការបង្កើតក្រុមគ្រូពេទ្យពេទ្យជំនាញនេះឡើង ក្រោយគេសង្កេតឃើញថា ព្រះមហាក្សត្រខ្មែរ និងសម្តេចម៉ែ តែងយាងទៅកាន់ទីក្រុងប៉េកាំង ប្រទេសចិន យ៉ាងទៀងទាត់ក្នុងរយៈពេល ៦ខែម្តង តាមការយាងរបស់ក្រុមគ្រូពេទ្យចិន។ហើយការសម្រេចបង្កើតថ្មីនេះជាការយកចិត្តដាក់បន្ថែមទៀតចំពោះសុខភាពរបស់ព្រះអង្គទាំងទ្វេ៕
