ខេត្តចំនួន៣នឹងបន្ត«ចុះត្រជាក់»នាពេលព្រឹកដល់១៧°C

ភ្នំពេញ៖ ក្រសួងធនធានទឹក នៅព្រឹកថ្ងៃទី២៤ ខែមករានេះ បានចេញសេចក្ដីជូនដំណឹង អំពីអាកាសធាតុនៅបន្តចុះត្រជាក់ដល់១៧ °C នៅខេត្តចំនួន៣ ក្នុងតំបន់ភាគឦសាន ក្នុងនោះរួមមាន ខេត្តមណ្ឌលគិរី ខេត្តព្រះវិហារ ខេត្តឧត្តរមានជ័យ ចាប់ពីថ្ងៃទី២៤-២៦ខែមករា ឆ្នាំ២០២៤។

ទ្រនុងសម្ពាធខ្ពស់ពីប្រទេសចិនបង្កើនឥទ្ធិពលមកលើខាងជើង និង ឦសានប្រទេសកម្ពុជាជាមួយនឹងខ្យល់មូសុងឦសានបក់ពីខ្សោយទៅមធ្យពី៥-៧ម៉ែត្រ/វិនាទី។

ស្ថានភាពបែបនេះនឹងធ្វើឱ្យ៖ ចាប់ពីថ្ងៃទី២៤ ដល់ថ្ងៃទី២៦ ខែមករា ឆ្នាំ២០២៤៖

១-តំបន់វាលទំនាប ៖

⁃ សីតុណ្ហភាពអប្បបរមាពី២១-២៤°C និងសីតុណ្ហភាពអតិបរមា ពី៣២-៣៤°C ហើយខ្យល់បក់មកពីទិសឦសាន ក្នុងល្បឿនពី ២-៥ម៉ែត្រ/វិនាទី

២-តំបន់ខ្ពង់រាប ៖

⁃ សីតុណ្ហភាពអប្បបរមាពី១៧-២២°C និងសីតុណ្ហភាពអតិបរមាពី៣១-៣៤°C ហើយខ្យល់បក់មកពីទិសឦសាន ក្នុងល្បឿនពី៣-៥ម៉ែត្រ/វិនាទី

⁃ ខេត្តមណ្ឌលគិរី ព្រះវិហារ និងខេត្តឧត្តរមានជ័យធាតុអាកាសត្រជាក់នៅពេលព្រឹក ជាមួយនឹងសីតុណ្ហភាពអប្បបរមាពី១៧-២០°C។

៣-តំបន់មាត់សមុទ្រ ៖

⁃ សីតុណ្ហភាពអប្បបរមាពី២៣-២៥°C និងសីតុណ្ហភាពអតិបរមាពី៣២-៣៤°C ហើយខ្យល់បក់មកពីទិសឦសានក្នុងល្បឿនពី២-៤ម៉ែត្រ/វិនាទី

⁃ រលកសមុទ្រមានកម្ពស់ពី០,៥០-១,២៥ម៉ែត្រ៕