ភ្នំពេញ៖ កម្មវិធីបណ្តុះបណ្តាលអ្នកសារព័ត៌មានវ័យក្មេង KAS មានគោលបំណងផ្តល់ជូននិស្សិតសារព័ត៌មាន និងអ្នកចូលចិត្តនូវបទពិសោធន៍ក្នុងការរាយការណ៍ព័ត៌មាន និងការសរសេរដោយធ្វើការនៅក្នុងបន្ទប់ព័ត៌មានជាក់ស្តែងរយៈពេលប្រាំមួយខែ។
បើតាមការផ្សព្វផ្សាយនៅក្នុងគេហទំព័ររបស់ Konrad-Adenauer-Stiftung (KAS) បានឱ្យដឹងថា បេក្ខជនដែលត្រូវបានជ្រើសរើសនឹងធ្វើការនៅបន្ទប់ព័ត៌មានផ្សេងៗក្នុងនាមជាអ្នកយកព័ត៌មានពេញម៉ោងដែលនឹងចូលរួមក្នុងការប្រជុំក្នុងបន្ទប់ព័ត៌មាន ការស្រាវជ្រាវ គំនិតនៃរឿងរ៉ាវ ធ្វើរបាយការណ៍វាល សរសេរអត្ថបទព័ត៌មាន និងអនុវត្តការងារពាក់ព័ន្ធផ្សេងទៀតដែលកំណត់ដោយអ្នកកែសម្រួល ឬអ្នកគ្រប់គ្រង។
ក្រៅពីទទួលបានការបណ្តុះបណ្តាល បេក្ខជននឹងមានឱកាសទទួលបានអត្ថប្រយោជន៍ដែលទទួលបានមានដូចជា អភិវឌ្ឍជំនាញវិជ្ជាជីវៈសារព័ត៌មាន បទពិសោធន៍ការងារនៅក្នុងបន្ទប់ព័ត៌មានឯករាជ្យដែលមានការគោរព បង្កើតបណ្តាញវិជ្ជាជីវៈផ្នែកសារព័ត៌មាន ទទួលបានជំនួយហិរញ្ញវត្ថុចំនួន $320។ ជាពិសេសអាចចូលទៅកាន់ព្រឹត្តិការណ៍ និងសកម្មភាពមួយចំនួនរបស់ KAS Cambodia និងក្លាយជាអតីតនិស្សិត KAS ព្រមទាំងទទួលបានវិញ្ញាបនបត្របញ្ជាក់ពីការបានបញ្ចប់វគ្គបណ្តុះបណ្តាលទៀតផង។
លក្ខខណ្ឌដែលយុវជនត្រូវមានដើម្បីអាចដាក់ពាក្យបានមានដូចជា បេក្ខជនជាត្រូវជាយុវជនដែលមានចំណាប់អារម្មណ៍ខ្លាំងលើវិស័យសារព័ត៌មាន មានសមត្ថភាពក្នុងការធ្វើការក្រោមសម្ពាធជាមួយនឹងពេលវេលាកំណត់តឹងតែង ព្រមទាំងអាចប្រើប្រាស់ភាសាអង់គ្លេសបានខ្ពស់ អាចចូលរួមព្រឹត្តិការណ៍ និងសកម្មភាពរបស់ KAS Cambodia និងសរសេររបាយការណ៍ក្នុងរយៈពេលពីរសប្តាហ៍បន្ទាប់ពីការបញ្ចប់វគ្គបណ្តុះបណ្តាល បន្ថែមពីនេះត្រួវមានការរក្សាទំនាក់ទំនងល្អជាមួយអ្នកគ្រប់គ្រងកម្មវិធី KAS Cambodia ក្នុងអំឡុងពេលកម្មវិធី។គួរបញ្ជាក់ផងដែរថាអ្នកដែលអាចដាក់ពាក្យបានអាចជានិស្សិតឆ្នាំទី 4 ទី 3 ឬនិស្សិតបញ្ចប់ការសិក្សាថ្មីៗដែលមានចំណាប់អារម្មណ៍ខ្លាំងលើផ្នែកសារព័ត៌មាន ជាអ្នកសរសេរប្លុក ជាអ្នកកាសែតអាជីពដំបូង ឬជាអ្នកសារព័ត៌មានប្រជាពលរដ្ឋ។
ដើម្បីអាចដាក់ពាក្យបាន បេក្ខជនត្រូវឆ្លងកាត់ដំណាក់កាលដូចជា ភ្ជាប់មកជាមួយប្រវត្តិរូបសង្ខេប (អតិបរមាពីរទំព័រ A4) លិខិតលើកទឹកចិត្ត (300 ពាក្យអតិបរមា) បញ្ជាក់ពីមូលហេតុដែលអ្នកចង់ចូលរួមក្នុងកម្មវិធីនេះ។
គំរូនៃការសរសេរពីមុន (អាចជាកិច្ចការសាលា ឬអត្ថបទដែលបានបោះពុម្ពផ្សាយ ប្លក់។ល។ បេក្ខជនត្រូវបញ្ជូនពាក្យស្នើសុំក្នុងទម្រង់ជា PDF មួយសន្លឹកដែលមានចំណងជើងថា “កម្មវិធីបណ្តុះបណ្តាលអ្នកសារព័ត៌មានវ័យក្មេង KAS 2024” ទៅកាន់លោក ផាន់ ស៊ូមី ប្រធានកម្មវិធីប្រព័ន្ធផ្សព្វផ្សាយ និងសារព័ត៌មាន តាមរយៈ [email protected] ។បេក្ខជនដែលមានចំណាប់អារម្មណ៍ ត្រូវដាក់ពាក្យឱ្យបានមុនពេលផុតកំណត់៖ 10 កុម្ភៈ 2024។ ជាមួយគ្នានោះផងដែរ ពាក្យស្នើសុំមិនពេញលេញ ឬមិនអនុវត្តតាមការណែនាំ នឹងមិនត្រូវបានគេពិចារណាឡើយ។
គួរបញ្ជាក់ផងដែរថា Konrad-Adenauer-Stiftung (KAS) Cambodia គឺជាអ្នកគាំទ្រដ៏លេចធ្លោមួយក្នុងការអភិវឌ្ឍន៍សារព័ត៌មាន និងការអប់រំអ្នកសារព័ត៌មាននៅកម្ពុជាតាំងពីឆ្នាំ 1994 ដោយជឿជាក់ថា វិស័យសារព័ត៌មានដើរតួនាទីយ៉ាងសំខាន់ក្នុងការលើកកម្ពស់លទ្ធិប្រជាធិបតេយ្យ និងការប្រមូលផ្តុំសង្គមដែលរួមបញ្ចូលនៅពេលដែលសំឡេងនីមួយៗត្រូវបានឮ៕
