ចិន៖ សិស្សសាលាចិនប្រមាណចំនួន ១៣ នាក់បានបាត់បង់ជីវិតនៅក្នុងភ្លើងឆេះសាលារៀនមួយខ្នងនៅក្នុងខេត្ត Henan ភាគកណ្តាលប្រទេសចិន នេះបើយោងតាមទីភ្នាក់ងារសារព័ត៌មាន Xinhua បានរាយការណ៍កាលពីថ្ងៃសៅរ៍ ។ អគ្គិភ័យនៅសាលា Yingcai នៃខេត្ត Henan ត្រូវបានឆាបឆេះយ៉ាងសន្ធោសន្ធៅកាលពីល្ងាចថ្ងៃសុក្រជុំវិញនៃការឆាបឆេះសាលារៀន និងបានសម្លាប់សិស្សរហូតដល់ ១៣នាក់នេះអាជ្ញាធរចិនកំពុងតែបើកការស៊ើបអង្កេត។
គ្រូបង្រៀននៅសាលាបាននិយាយថា ជនរងគ្រោះទាំងអស់មកពីថ្នាក់ទី៣ដូចគ្នា មានអាយុ៩ឆ្នាំ និង១០ឆ្នាំ។ សាលា Yingcai ជាសាលាឯកជនដែលមានប្រវត្តិជាង១០ឆ្នាំ។ បើតាមឪពុកម្តាយរបស់សិស្សម្នាក់នៅសាលា បានឲ្យដឹងថា ក្រោយកើតហេតុ កូនរបស់គាត់ត្រូវបានមន្ត្រីនាំមកផ្ទះនៅម៉ោងប្រហែល ៦ ព្រឹកថ្ងៃសៅរ៍ ហើយថ្ងៃចូលរៀនវិញក៏មិនទាន់ត្រូវបានបញ្ជាក់ពីខាងសាលាដែរ៕
