កំពង់ឆ្នាំង៖ សិស្សានុសិស្សប្រមាណជាង ២៥០នាក់ នៅអនុវិទ្យាល័យផ្សារត្រាច កាលពីថ្ងៃទី១១ មករា បានទទួលការបណ្ដុះបណ្ដាលបន្ថែមលើចំណេះដឹងផ្នែកសុវត្ថិភាពម្ហូបអាហារពីមន្រ្តីជំនាញនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) សាខាខេត្តកំពង់ឆ្នាំង។
សិស្សានុសិស្ស និងលោកគ្រូ អ្នកគ្រូចំនួន ២៩០នាក់ ដែលក្នុងនោះមានសិស្សប្រមាណ ២៥០នាក់ បានទទួលការបណ្ដុះបណ្ដាលបន្ថែមលើចំណេះដឹងផ្នែក «សុវត្ថិភាពម្ហូបអាហារ» ពីមន្រ្តីជំនាញ ក.ប.ប. ប្រចាំខេត្តកំពង់ឆ្នាំង ស្ថិតនៅ អនុវិទ្យាល័យផ្សារត្រាច ស្រុកសាមគ្គីមានជ័យ។
វគ្គបណ្ដុះបណ្ដាលនេះគឺជួយឱ្យសិស្សានុសិស្ស លោកគ្រូ អ្នកគ្រូបានស្វែងយល់បន្ថែមនូវពុទ្ធិផ្នែកច្បាប់ ការជ្រើសរើសម្ហូបអាហារដែលមានសុវត្ថិភាពសម្រាប់ខ្លួនឯងនិងក្រុមគ្រួសារ ការទុកដាក់អាហារឱ្យបានត្រឹមត្រូវតាមបទដ្ឋានបច្ចេកទេស និងការទទួលទានអាហារឱ្យបានត្រឹមត្រូវជៀសវាងការពុលអាហារដោយឥតព្រៀងទុក៕
