រដ្ឋមន្ត្រីការងារបដិសេធ«តេលេក្រាមរើសពលករ»ទៅធ្វើការនៅអ៊ីស្រាអែលខណៈកិច្ចព្រមព្រៀងមិនទាន់មាន

ភ្នំពេញ៖ រដ្ឋមន្ត្រីក្រសួងការងារ នាថ្ងៃទី៣ មករា នេះ បានចេញសារថា កម្ពុជាមិនទាន់បានចុះកិច្ចព្រមព្រៀងក្នុងការបញ្ជូនពលករទៅធ្វើការនៅប្រទេសអ៊ីស្រាអែលនៅឡើយទេ។ ការចេញសារយ៉ាងដូច្នេះបន្ទាប់ពីមានជនខិលខូចមួយរូបដែលមានឈ្មោះក្នុងតេលេក្រាម MEAN Sodara បង្កើតតេលេក្រាមកាណាល់មួយឈ្មោះ ISRAEL WORK 2024 ដើម្បីជ្រើសរើស និងបញ្ជូនពលករឱ្យទៅធ្វើការងារនៅប្រទេសអ៊ីស្រអែល ដោយខុសច្បាប់។

បើតាមលោក ហេង សួរ រដ្ឋមន្ត្រីក្រសួងការងារ បានឱ្យដឹងថា កម្ពុជាមិនទាន់បានចុះកិច្ចព្រមព្រៀងក្នុងការបញ្ជូនពលករទៅធ្វើការនៅប្រទេសអ៊ីស្រអែលនៅឡើយ ពោលគឺកំពុងស្ថិតនៅក្នុងដំណាក់កាលពិភាក្សាគ្នានៅឡើយ ដូច្នេះការចេញទៅធ្វើការនៅប្រទេសអ៊ីស្រអែលតាមរយៈមេខ្យល់ ឬរូបភាពក្លែងបន្លំឯកសារជាសិស្ស ឬជានិស្សិត គឺជាករណីខុសច្បាប់ និងជាបទល្មើសនៃការជួញដូរមនុស្ស។

ក្រសួងបានសុំឱ្យសាធារណជនប្រុងប្រយ័ត្នកុំចាញ់បោកបុគ្គល MEAN Sodara ឬខ្លឹមសារដែលបានផ្សព្វផ្សាយនៅតេលេក្រាមកាណល់ ISRAEL WORK 2024 ឱ្យសោះ។ បច្ចុប្បន្នក្រសួងការងារ កំពុងធ្វើការជាមួយគណៈកម្មាធិការជាតិប្រយុទ្ធប្រឆាំងការជួញដូរមនុស្សដើម្បីចាត់វិធានការណ៍ដល់បុគ្គលពាក់ព័ន្ធ៕