ភ្នំពេញ៖ វេបសាយអប់រំ (uniRank) របស់ប្រទេសអូស្ដ្រាលី បានធ្វើការវាយតម្លៃគ្រឹះស្ថានឧត្តមសិក្សាកម្ពុជាចំនួន៤៩ ដែលបំពេញតាមលក្ខណៈវិនិច្ឆ័យជ្រើសរើសរបស់ UniRank។ នៅក្នុងការវាយតម្លៃនោះ សាកលវិទ្យាល័យ និងមហាវិទ្យាល័យ ចំនួន ១០ បានជាប់ជាសាកលវិទ្យាល័យ និងមហាវិទ្យាល័យ ដែលល្អបំផុត និងពេញនិយមជាងគេ នៅប្រទេសកម្ពុជា ក្នុងឆ្នាំ២០២៣នេះ។
UniRank បានធ្វើការវាយតម្លៃសាលាទាំងនោះ ដោយពិនិត្យមើលនូវលក្ខណ្ឌដូចជា សាលាទាំងនោះត្រូវបានចាត់តាំង ផ្តល់អាជ្ញាបណ្ណ ឬទទួលស្គាល់ដោយអង្គការពាក់ព័ន្ធការអប់រំឧត្តមសិក្សាកម្ពុជា, ផ្តល់បរិញ្ញាបត្រយ៉ាងតិចបីឆ្នាំ ឬក្រោយបរិញ្ញាបត្រអនុបណ្ឌិត ឬបណ្ឌិត, និង ការផ្តល់វគ្គសិក្សាភាគច្រើនជាទម្រង់អប់រំបែបប្រពៃណី មិនមែនជាការអប់រំពីចម្ងាយ។
សាកលវិទ្យាល័យ និងមហាវិទ្យាល័យ ចំនួន ១០ ជាប់ចំណាប់ថ្នាក់នៃការវាយតម្លៃល្អបំផុត និង ពេញនិយមជាងគេនៅកម្ពុជាឆ្នាំ២០២៣មានជាអាទិ៍៖ ១.សាកលវិទ្យាល័យភូមិន្ទភ្នំពេញ ២.វិទ្យាស្ថានបច្ចេកវិទ្យាកម្ពុជា ៣.សាកលវិទ្យាល័យពុទ្ធិសាស្ត្រ ៤.សាកលវិទ្យាល័យភូមិន្ទវិចិត្រសិល្បៈ ៥.សាកវិទ្យាល័យបញ្ញាសាស្ត្រ ៦.សាកលវិទ្យាល័យកម្ពុជា ៧.សាកលវិទ្យាល័យន័រតុន ៨.រាជបណ្ឌិត្យសភាកម្ពុជា ៩.សាកលវិទ្យាល័យភូមិន្ទកសិកម្ម ១០.សាកលវិទ្យាល័យមេគង្គកម្ពុជា។
គួរបញ្ជាក់ថា UniRank ត្រូវបានបង្កើតឡើងក្នុងឆ្នាំ២០០៥ នៅទីក្រុងស៊ីដនី ប្រទេសអូស្ដ្រាលី ជាវេបសាយអប់រំ ដែលចាត់ចំណាត់ថ្នាក់នៃសាកលវិទ្យាល័យ និង មហាវិទ្យាល័យ ទទួលស្គាល់ជាផ្លូវការជាង ១៣,៩០០ ក្នុង ២០០ប្រទេស ក្នុងពិភពលោក៕
