ភ្នំពេញ៖ កម្ពុជាកំពុងដាក់ចេញយុទ្ធសាស្រ្តកាត់បន្ថយការប្រើប្រាស់ប្លាស្ទិក ស្របនឹងនិន្នាការពិភពលោកដែលកំពុងគិតគូបង្កើតសន្ធិសញ្ញាកាត់បន្ថយប្លាស្ទិកជាសកលលើកដំបូងដែលមិនធ្លាប់មាន នៅទីក្រុងណៃរ៉ូប៊ី ប្រទេសកេនយ៉ា ដើម្បីទប់ស្កាត់ការបំពុលដោយប្លាស្ទិក។ សន្ធិសញ្ញានេះ បើតាមការឲ្យដឹងពីមន្ត្រីដែលពាក់ព័ន្ធ នឹងដាក់ក្នុងរបៀបវរៈនៃការចរចានៅចុងឆ្នាំ ២០២៤។
ខណៈដែលប្រទេសនានាលើពិភពលោក កំពុងឈានចូលកិច្ចចរចាមួយផ្សេងទៀត ក្នុងសប្តាហ៍នេះ ស្តីពីការបង្កើតសន្ធិសញ្ញាលើកដំបូង ដែលមិនធ្លាប់មាន ដើម្បីទប់ស្កាត់ការបំពុលដោយប្លាស្ទិក យុទ្ធនាការកាត់បន្ថយការប្រើប្រាស់ប្លាស្ទិក កំពុងត្រូវបានអនុវត្តនៅទូទាំងប្រទេសកម្ពុជាផងដែរ និងបានកំពុងមានការចូលរួម និងការប្តេជ្ញាចិត្តពី លោកគ្រូ អ្នកគ្រូ សិស្សានុសិស្សនៅតាមសាលារៀន និងអ្នកពាក់ព័ន្ធផ្សេងៗទៀត ចំនួនជាងពាក់កណ្តាលប្រទេស តាមទិសស្លោក «ថ្ងៃនេះខ្ញុំមិនប្រើថង់ប្លាស្ទិកទេ»។
សូមបញ្ជាក់ថា នៅក្នុងកិច្ចចរចារក្របខណ្ឌអង្គការសហប្រជាជាតិ បណ្តាប្រទេសជាសមាជិក នៅក្នុងសប្តាហ៍នេះ កំពុងពិនិត្យបង្កើតសន្ធិសញ្ញាកាត់បន្ថយប្លាស្ទិកជាសកល នៅទីក្រុងណៃរ៉ូប៊ី ប្រទេសកេនយ៉ា។ ក្រុមមន្ត្រីកំពុងរៀបចំការចរចា លើកឡើងថាតើត្រូវកំណត់បរិមាណប្លាស្ទិក ដែលកំពុងផលិត ឬផ្តោតលើការគ្រប់គ្រងសំណល់ប្លាស្ទិក។ សន្ធិសញ្ញានេះ បើតាមការឲ្យដឹងពីមន្ត្រីដែលពាក់ព័ន្ធ នឹងដាក់ក្នុងរបៀបវរៈនៃការចរចានៅចុងឆ្នាំ ២០២៤៕
