ភ្នំពេញ៖ សម្ដេច ហ៊ុន ម៉ាណែត នៅថ្ងៃទី ០៧ វិច្ចកា ស្អែកនេះ នឹងអញ្ជើញចុះជួបសំណេះសំណាលជាមួយកម្មករ និយោជិត នៅតាមបណ្តារោងចក្រ សហគ្រាសចំនួន ៣០ ដែលមានមូលដ្ឋានក្នុងតំបន់សេដ្ឋកិច្ចពិសេស ខេមបូឌា ចេជាង ហ្គ័រជី ខេត្តព្រះសីហនុ។
សម្ដេច ហ៊ុន ម៉ាណែត នាយករដ្ឋមន្ត្រីនៃកម្ពុជា នឹងអញ្ជើញចុះជួបសំណេះសំណាលជាមួយបងប្អូនកម្មករ និយោជិត ចំនួន ១៥ ១៩៤ នាក់ នៅតាមបណ្តារោងចក្រ សហគ្រាសចំនួន ៣០ ដែលមានមូលដ្ឋានក្នុងតំបន់សេដ្ឋកិច្ចពិសេស ខេមបូឌា ចេជាង ហ្គ័រជី ខេត្តព្រះសីហនុ។
រោងចក្រ សហគ្រាសទាំង ៣០នេះ មានដូចជាក្រុមហ៊ុនអភិវឌ្ឍន៍ពិសេស ចំនួន ១, រោងចក្រផលិតគ្រឿងសង្ហារឹម ចំនួន ១១, រោងចក្រកាត់ដេរសម្លៀកបំពាក់ ចំនួន ៤, រោងចក្រផលិតសម្ភារសត្វចិញ្ចឹម ចំនួន ២, រោងចក្រកេសកាតុង ចំនួន ២, រោងចក្រផលិតចំណីសត្វ ចំនួន ២, រោងចក្រផលិតថ្មម៉ាប ចំនួន ១, រោងចក្រកែច្នៃស្បែក ចំនួន ១, រោងចក្រផលិតសម្ភារការិយាល័យ ចំនួន ១, រោងចក្រដេរស្បែកជើង ចំនួន ១, រោងចក្រផលិតស្បែកជើង កាបូប និងខ្សែក្រវាត់ ចំនួន ១, រោងចក្រជ្រលក់ក្រណាត់ ចំនួន ១, រោងចក្រផលិតអេប៉ុង ចំនួន ១, និងរោងចក្រកែច្នៃផលិតផលជ័រ និងគ្រឿងផ្លាស្ទិច ចំនួន ១ ផងដែរ។
គួរបញ្ជាក់ថា នេះ គឺជាលើកទី៩ ដែលសម្តេច ហ៊ុន ម៉ាណែត បានអញ្ជើញចុះជួបសំណេះសំណាលជាមួយនឹងបងប្អូនកម្មករ និយោជិត តាមបណ្តារោងចក្រ សហគ្រាសនានា ក្នុងឋានៈជា នាយករដ្ឋមន្ត្រី នៃកម្ពុជា៕
