ភ្នំពេញ៖ កម្ពុជា-ចិន ឯកភាពផ្តួចផ្តើមឱ្យមានសកម្មភាពគ្រប់ជ្រុងជ្រោយ ដើម្បីត្រៀមប្រារព្ធ “ឆ្នាំនៃការផ្លាស់ប្តូរប្រជាជន និងប្រជាជន” ដែលគ្រោងធ្វើនៅឆ្នាំ ២០២៤ សំដៅទាក់ទាញទេសចរចិនមកទស្សនាកម្ពុជាបន្ថែមទៀត។ ការឯកភាពនេះធ្វើឡើងក្នុងជំនួបរវាងរដ្ឋមន្រ្តីក្រសួងការបរទេសកម្ពុជា ជាមួយឯកអគ្គរដ្ឋទូតចិនប្រចាំកម្ពុជា។
ក្នុងជំនួបពិភាក្សារវាង លោក សុខ ចិន្តាសោភា រដ្ឋមន្ត្រីការបរទេសកម្ពុជា និងលោក វ៉ាន វិនធាន ឯកអគ្គរដ្ឋទូតចិនប្រចាំកម្ពុជា បានវាយតម្លៃខ្ពស់ចំពោះវឌ្ឍនភាពគួរឱ្យកត់សម្គាល់នៃទំនាក់ទំនង និងកិច្ចសហប្រតិបត្តិការកម្ពុជា-ចិន ដែលផ្តល់ផលប្រយោជន៍ទៅវិញទៅមកសម្រាប់ប្រទេស និងប្រជាជន ទាំងពីរ ព្រមទាំងបានសម្តែងនូវសុទិដ្ឋិនិយមរួមគ្នាថា ភាពជាដៃគូជិតស្និទ្ធនេះនឹងកាន់តែរីកចម្រើនលូតលាស់បន្ថែមទៀត។
ភាគីទាំងពីរបានអះអាងជាថ្មីនូវការប្ដេជ្ញាចិត្តឥតងាករេក្នុងការអនុវត្តកិច្ចព្រមព្រៀង និងកុងសង់ស៊ីស ដែលថ្នាក់ដឹកនាំកំពូលនៃប្រទេសទាំងពីរបានឯកភាពជាមួយគ្នានាពេលកន្លងមក រួមមាន (១) ការដាក់ចេញនូវ"កិច្ចសហប្រតិបត្តិការត្បូងពេជ្រ" និង (២) ការបង្កើត"ច្រករបៀងឧស្សាហកម្មនិងបច្ចេកវិទ្យា" និង"ច្រករបៀងមច្ឆា និងអង្ករ” ដែលសម្តេច ហ៊ុន សែន និងលោកប្រធានាធិបតី ស៊ី ជីនពីង បានឯកភាពគ្នាកាលពីខែកុម្ភៈ ឆ្នាំ២០២៣។
ជាមួយគ្នានោះ ភាគីទាំងពីរបានកត់សម្គាល់ដោយការពេញចិត្តនូវជំនួបប្រកបដោយផ្លែផ្ការវាងសម្ដេច ហ៊ុន ម៉ាណែត និងថ្នាក់ដឹកនាំចិន ជាពិសេសជំនួបជាមួយ លោកប្រធានាធិបតី ស៊ី ជីនពីង និង លោកនាយករដ្ឋមន្ត្រី លី ឈាង ក្នុងឱកាសទស្សនកិច្ចរបស់សម្ដេចធិបតីទៅកាន់ប្រទេសចិន។
លោកឧបនាយករដ្ឋមន្ត្រី និង លោកឯកអគ្គរដ្ឋទូត បានឯកភាពផ្តួចផ្តើមឱ្យមានសកម្មភាពគ្រប់ជ្រុងជ្រោយ ដើម្បីត្រៀមប្រារព្ធ “ឆ្នាំនៃការផ្លាស់ប្តូរប្រជាជន និងប្រជាជន” ដែលគ្រោងធ្វើនៅឆ្នាំ ២០២៤ សំដៅទាក់ទាញទេសចរចិនមកទស្សនាកម្ពុជាបន្ថែមទៀត៕
