ភ្នំពេញ៖ វគ្គផ្ដាច់ព្រ័ត្រនៃកម្មវិធីបញ្ញវន្តឌីជីថល នឹងចាក់ផ្សាយនៅថ្ងៃទី២៧ ខែតុលា បន្ទាប់ពីរយៈពេល ១៤សប្ដាហ៍បានកន្លងផុតទៅ ដែលមានការប្រកួតប្រជែងយ៉ាងស្វិតស្វាញរវាងសិស្សឆ្នើមមកពីគ្រប់ខេត្តក្រុងទូទាំងប្រទេសកម្ពុជា។
កម្មវិធីបញ្ញវន្តឌីជីថលត្រូវបានផលិតឡើងដោយសមស្របទៅតាមឆន្ទៈរបស់ក្រសួងប្រៃសណីយ៍និងទូរគមនាគមន៍ និងចូលរួមគាំទ្រដោយក្រសួង អប់រំយុវជន និងកីឡា។ វគ្គផ្ដាច់ព្រ័ត្រនៃកម្មវិធីបញ្ញវន្តឌីជីថល នឹងចាក់ផ្សាយនៅថ្ងៃទី២៧ ខែតុលា ឆ្នាំ២០២៣ វេលាម៉ោង6ល្ងាច នៅលើទំព័ររបស់ក្រសួងប្រៃសណីយ៍និងទូរគមនាគមន៍។
បើតាមគេហទំព័រជាផ្លូវការរបស់ក្រសួងប្រៃសណីយ៍និងទូរគមនាគមន៍(MPTC) បានឱ្យដឹងថា កម្មវិធីបិទការប្រកួតជ័យលាភីបញ្ញវន្តឌីជីថល២០២៣នឹងមានការចូលរួមក្រោមអធិបតីលោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ ដែលនឹងប្រគល់រង្វាន់ទៅកាន់ជ័យលាភីនៅវគ្គផ្ដាច់ព្រ័ត្រ។ព្រឹត្តិការណ៍នេះបានធ្វើឡើងនៅសណ្ឋាគារ រ៉ូសវូឌ ភ្នំពេញ (Rosewood Phnom Penh)។
ក្នុងចំណោមបេក្ខភាពចុងក្រោយទាំង៦រូប ជើងឯកនៃកម្មវិធីនឹងទទួលបានប្រាក់រង្វាន់១៥.០០០.០០០រៀល លេខ2 ទទួលបានប្រាក់រង្វាន់១០.០០០.០០០រៀល និងលេខ3ទទួលបានប្រាក់រង្វាន់៥.០០០.០០០រៀល។ ចំណែកឯបេក្ខភាពបីរូបនឹងទទួលបានអាហារូបករណ៍ថ្នាក់បរិញ្ញាបត្រពេញម៉ោងរយៈពេល4ឆ្នាំពេញ នៅទៅសាកលវិទ្យាល័យអាមេរិកាំងភ្នំពេញ។
កម្មវិធីនេះកើតមានឡើងដោយស្របទៅតាមគោលដៅ និងគំនិតផ្តួចផ្តើមរបស់ក្រសួង ក្នុងការពង្រឹងចំណេះដឹងឌីជីថលដល់យុវជនកម្ពុជា និងឆ្លៀតឱកាសនេះផងដែរដើម្បីលើកកម្ពស់ចំណេះដឹងខាងផ្នែកប្រព័ន្ធបច្ចេកវិទ្យាស្របទៅតាមឆន្ទៈ និងចក្ខុវិស័យនៃគម្រោងកម្ពុជាឆ្ពោះទៅឌីជីថលរបស់ក្រសួងប្រៃសណីយ៍និងទូរគមនាគមន៍។ នៅក្នុងវគ្គនីមួយៗនៃកម្មវិធីបញ្ញវន្តឌីជីថលរដូវកាលទី១កន្លងមកនេះបានបង្ហាញឲ្យឃើញថាកម្មវិធីបញ្ញវន្តឌីជីថលគឺជាការប្រកួតប្រជែងលំដាប់ថ្នាក់ជាតិដោយមានការចូលរួមពីវត្តមានបេក្ខជន និងបេក្ខនារីមកពីទូទាំងខេត្តក្រុងនៃ ប្រទេសកម្ពុជា ដើម្បីមកបង្ហាញពីភាពក្លាហាន ចំណេះដឹង ភាពច្នៃប្រឌិត និងជំនាញឌីជីថលរបស់ពួកគេ។
គួរបញ្ជាក់ផងដែរថា កម្មវិធីបញ្ញវន្តឌីជីថល គឺជាកម្មវិធីមួយដែលរៀបរាងដោយក្រុមហ៊ុន iDEN Agency ជាទីភ្នាក់ងារ និងជាដៃគូរដែលផ្ដល់ដំណោះស្រាយប្រកបដោយភាពច្នៃប្រឌិត និងស្មោះត្រង់៕
