(ចិន)៖ ប្រធានាធិបតីចិន លោក ស៊ី ជីនពីង បានជួបប្រជុំជាមួយនឹងនាយករដ្ឋមន្ត្រីថៃ លោក សេដ្ឋា ថាវីស៊ីនដែលកំពុងធ្វើដំណើរទស្សនកិច្ចនៅទីក្រុងប៉េកាំង កាលពីថ្ងៃព្រហស្បតិ៍ ដោយប្រទេសថៃបានសម្តែងការគាំទ្ររបស់ខ្លួនចំពោះគោលនយោបាយ «ប្រទេសមួយប្រព័ន្ធគ្រប់គ្រងពីរ»របស់ប្រទេសចិន ហើយបានសង្កត់ធ្ងន់ថា តៃវ៉ាន់គឺជាផ្នែកដែលមិនអាចកាត់ផ្តាច់បាននៃប្រទេសចិន។
ក្រោយមក រដ្ឋាភិបាលទាំងពីរបានរួមគ្នាចេញសេចក្តីថ្លែងការណ៍រួមមួយដោយបញ្ជាក់ថា មេដឹកនាំនៃប្រទេសទាំងពីរបានអះអាងសារជាថ្មីអំពីភាពជាដៃគូសហប្រតិបត្តិការយុទ្ធសាស្ត្រលើគ្រប់ជ្រុងជ្រោយរវាងចិន-ថៃ ដោយផ្លាស់ប្តូរទស្សនៈដ៏ស៊ីជម្រៅលើទំនាក់ទំនងចិន-ថៃ និងបញ្ហានៃក្តីកង្វល់រួម ហើយបានយល់ព្រមប្រឈមមុខនឹងភាពស្មុគស្មាញ និងការផ្លាស់ប្តូរនៃស្ថានភាពអន្តរជាតិ និងតំបន់ ភាគីទាំងពីរគួរតែរួមគ្នាលើការរៀបចំផែនការ និងការជំរុញការអភិវឌ្ឍទំនាក់ទំនងចិន-ថៃ តាមទស្សនវិស័យរយៈពេលវែង និងការកម្ពស់ជាយុទ្ធសាស្ត្រ បន្តពង្រឹងអត្ថន័យសហសម័យនៃ "ប្រទេសចិន និង ប្រទេសថៃគឺជាគ្រួសារតែមួយ” ហើយសម្រេចបាននូវស្ថិរភាព វិបុលភាព និងនិរន្តរភាពរវាងចិន-ថៃ ក្នុងនាមជាសហគមន៍មួយដែលមានអនាគតរួមគ្នា និងស្វាគមន៍រួមគ្នានូវខួបលើកទី 50 នៃការបង្កើតទំនាក់ទំនងការទូតរវាងចិន និងថៃនៅឆ្នាំ 2025។
សេចក្តីថ្លែងការណ៍បានសង្កត់ធ្ងន់ថា ភាគីទាំងពីរនឹងបន្តគាំទ្រគ្នាទៅវិញទៅមកលើបញ្ហាពាក់ព័ន្ធនឹងផលប្រយោជន៍ស្នូល និងកង្វល់សំខាន់ៗរបស់គ្នាទៅវិញទៅមក។ ប្រទេសចិនគោរពឯករាជ្យ អធិបតេយ្យភាព និងបូរណភាពទឹកដីរបស់ប្រទេសថៃ។ ប្រទេសថៃប្រកាន់ខ្ជាប់យ៉ាងខ្ជាប់ខ្ជួននូវគោលនយោបាយចិនតែមួយ ហើយទទួលស្គាល់ថារដ្ឋាភិបាលនៃសាធារណៈរដ្ឋប្រជាមានិតចិនគឺជារដ្ឋាភិបាលស្របច្បាប់តែមួយគត់តំណាងឱ្យប្រទេសចិនទាំងអស់ ហើយតៃវ៉ាន់គឺជាផ្នែកដែលមិនអាចកាត់ផ្តាច់ពីប្រទេសចិនបាន។ ប្រទេសថៃគាំទ្រគោលនយោបាយ «ប្រទេសមួយប្រព័ន្ធគ្រប់គ្រងពីរ»របស់ប្រទេសចិន។
សេចក្តីថ្លែងការណ៍បានបញ្ជាក់ថា ភាគីទាំងពីរបានលើកទឹកចិត្តឱ្យមានការផ្លាស់ប្តូរភ្ញៀវទេសចរទៅវិញទៅមក ដោយសង្កត់ធ្ងន់លើសារៈសំខាន់នៃគុណភាពសេវាកម្មទេសចរណ៍ និងសុវត្ថិភាពទេសចរណ៍ ហើយបានយល់ព្រមចាប់ផ្តើមការចរចាឡើងវិញលើកិច្ចព្រមព្រៀងលើកលែងទិដ្ឋាការទៅវិញទៅមកសម្រាប់អ្នកកាន់លិខិតឆ្លងដែនធម្មតានៃប្រទេសទាំងពីរ។ ភាគីទាំងពីរបានឯកភាពពង្រឹងទំនាក់ទំនងរវាងអាជ្ញាធរវប្បធម៌ និងទេសចរណ៍នៃប្រទេសទាំងពីរ លើកទឹកចិត្តសហគ្រាសទេសចរណ៍នៃប្រទេសទាំងពីរ រួមគ្នាបង្កើតផលិតផលទេសចរណ៍ អភិវឌ្ឍធនធានមនុស្ស និងគាំទ្រការលើកកម្ពស់ទីផ្សារទេសចរណ៍ និងការកសាងយន្តការគ្នាទៅវិញទៅមក។ គាំទ្រក្រុមហ៊ុនដឹកជញ្ជូនតាមផ្លូវអាកាសនៃភាគីទាំងសងខាងក្នុងការបង្កើនជើងហោះហើររវាងចិន និងថៃ ទៅតាមតម្រូវការទីផ្សារ ដើម្បីជួយសម្រួលដល់កិច្ចសហប្រតិបត្តិការសេដ្ឋកិច្ច និងពាណិជ្ជកម្មទ្វេភាគី និងការផ្លាស់ប្តូរបុគ្គលិក៕
