ហ្សេរុយសាឡឹម៖ រដ្ឋមន្ត្រីការពារជាតិអ៊ីស្រាអែល លោក Yoav Gallant នៅថ្ងៃចន្ទ ទី៩ ខែតុលានេះបានបញ្ជាឱ្យ "ឡោមព័ទ្ធទាំងស្រុង" លើតំបន់ហ្គាហ្សាស្ទ្រីប ខណៈដែលយោធាបានវាយលុកតំបន់ប៉ាឡេស្ទីនដោយការវាយប្រហារតាមអាកាសនិងបានផ្តាច់ជីវិតទាហាន និងពលរដ្ឋប៉ាឡេស្ទីនអស់ជាច្រើននាក់។
លោក Gallant បាននិយាយនៅក្នុងសេចក្តីថ្លែងការណ៍ជាវីដេអូដោយសំដៅទៅលើតំបន់ដែលមានប្រជាជនប្រមាណ ២ លាននាក់ថា "យើងកំពុងធ្វើការឡោមព័ទ្ធទាំងស្រុងលើហ្គាហ្សាតំបន់ហ្គាហ្សា បច្ចុប្បន្ននេះតំបន់នេះគ្មានអគ្គិសនី គ្មានអាហារ គ្មានទឹក គ្មានឧស្ម័ន ហើយកំពុងតែត្រូវបានបិតទាំងស្រុង" ។
យ៉ាងហោចណាស់មនុស្ស ៧០០ នាក់ត្រូវបានសម្លាប់នៅភាគខាងត្បូងប្រទេសអ៊ីស្រាអែល នៅពេលដែលក្រុមសកម្មប្រយុទ្ធហាម៉ាសបានវាយលុកឆ្លងកាត់ព្រំដែនកាលពីថ្ងៃសៅរ៍ ដោយបានបាញ់មនុស្សនៅក្នុងសហគមន៍ និងទីប្រជុំជននានានៅជិតតំបន់ហ្គាហ្សា មុនពេលកងកម្លាំងសន្តិសុខអ៊ីស្រាអែលចាប់ផ្តើមវាយបកវិញ។
យោងតាមអង្គការដែលជួយរកសាកសពឃើញមនុស្ស ២៥០ នាក់ត្រូវបានសម្លាប់ដោយខ្មាន់កាំភ្លើងក្រុមហាម៉ាស់នៅក្នុងពិធីបុណ្យតន្ត្រីមួយដែលបានចូលរួមដោយយុវជនអ៊ីស្រាអែល និងជនបរទេសនៅជិត Kibbutz Reim ជិតតំបន់ហ្គាហ្សា៕
