ចិន៖ ព្រះមហាក្សត្រ នរោត្តម សីហមុនី នៅថ្ងៃទី២៣ កញ្ញា បានជួបជាមួយប្រធានាធិបតីចិនលោក ស៊ី ជីនពីង នៅក្នុងពិធីបើកការប្រកួតកីឡាអាស៊ីលើកទី១៩ នៅខេត្ត Zhejiang ភាគខាងកើតប្រទេសចិន។ ព្រះមហាក្សត្រខ្មែរ និងប្រធានាធិបតីចិន បានប្តេជ្ញាជំរុញការកសាងសហគមន៍ចិន-កម្ពុជា ជាមួយនឹងអនាគតរួមគ្នា និង បន្តជំរុញការផ្លាស់ប្តូរ និងកិច្ចសហប្រតិបត្តិការឱ្យបានកាន់តែស៊ីជម្រៅ។
លោក ស៊ី ជីនពីង មានប្រសាសន៍ថា ប្រទេសចិនផ្តល់តម្លៃដល់ទំនាក់ទំនងមិត្តភាព ពិសេសជាមួយព្រះរាជវង្សានុវង្សកម្ពុជា យកចិត្តទុកដាក់យ៉ាងខ្លាំងចំពោះការអភិវឌ្ឍន៍ទំនាក់ទំនងចិន-កម្ពុជា ហើយត្រៀមខ្លួនជាស្រេចក្នុងការធ្វើការជាមួយកម្ពុជា ដើម្បីធ្វើឱ្យស៊ីជម្រៅ និងធ្វើឱ្យមានវឌ្ឍនភាពរឹងមាំក្នុងការកសាងសហគមន៍ចិន-កម្ពុជា ជាមួយនឹងអនាគតរួមគ្នា។
លោក ស៊ី ជីនពីង បានបន្ដថា ប្រទេសចិនគាំទ្រកម្ពុជាក្នុងការដើរតាមមាគ៌ាអភិវឌ្ឍន៍ដែលសមស្របនឹងលក្ខខណ្ឌជាតិរបស់ខ្លួន ក្នុងការសម្រេចបាននូវស្ថិរភាព និងការអភិវឌ្ឍន៍ និងក្នុងការដើរតួនាទីយ៉ាងសំខាន់នៅលើឆាកអន្តរជាតិ និងតំបន់។ លោកបានគូសបញ្ជាក់ថា ភាគីទាំងពីរគួរតែធ្វើឱ្យស៊ីជម្រៅកិច្ចសហប្រតិបត្តិការផ្តល់ផលប្រយោជន៍ទៅវិញទៅមក ពិសេសភាគីទាំងសងខាងបន្តជំរុញការផ្លាស់ប្តូរ និងកិច្ចសហប្រតិបត្តិការលើវិស័យអប់រំ វប្បធម៌ យុវជន និងវិស័យផ្សេងៗទៀត ដើម្បីធ្វើឱ្យចំណងមិត្តភាពកម្ពុជា-ចិន ចាក់ឫសក្នុងបេះដូងប្រជាជននៃប្រទេសទាំងពីរ។
ជាមួយគ្នានោះ ព្រះមហាក្សត្រ នរោត្តម សីហមុនី បានប្រសាសន៍ថា កម្ពុជាគាំទ្រយ៉ាងពេញទំហឹងនូវគោលការណ៍មិត្តភាព ស្មោះស្ម័គ្រ ផលប្រយោជន៍ទៅវិញទៅមក និងបរិយាប័ន្ន ដែលបានដាក់ចេញដោយប្រធានាធិបតីចិន។ ជាពិសេស កម្ពុជាប្រកាន់ខ្ជាប់នូវគោលនយោបាយចិនតែមួយ ហើយត្រៀមខ្លួនជាស្រេចដើម្បីធ្វើការជាមួយប្រទេសចិន៕
