ក្រសួងសុខាភិបាលសម្រេចលុបលេខបញ្ញិកាផលិតផលបំប៉នសុខភាព២មុខ ក្រោយរកឃើញមានប៉ះពាល់សុខភាពធ្ងន់ធ្ងរ

ភ្នំពេញ៖ ក្រសួងសុខាភិបាលនៃព្រះរាជាណាចក្រកម្ពុជា បានចេញសេចក្ដីប្រកាសសម្រេចលុបលេខបញ្ញិកាផលិតផលបំប៉នសុខភាពចំនួន២មុខ ក្រោយរកឃើញថាផលិតផលទាំងនេះមានផ្ទុកសារធាតុដែលនាំឱ្យប៉ះពាល់ធ្ងន់ធ្ងរដល់សុខភាពរបស់អ្នកប្រើប្រាស់។ នេះបើតាមសេចក្ដីប្រកាសរបស់ក្រសួងសុខាភិបាល នៅថ្ងៃទី២២ ខែកញ្ញា ឆ្នាំ២០២៣។

បើតាមសេចក្ដីប្រកាស ក្រសួងសុខាភិបាលបានបញ្ជាក់ថា ផលិតផលបំប៉នសុខភាព GINSENG PRO B/Bott./30 Caps. Lot No: 20230405, MFG DATE: 04-2023, EXP.DATE:04-2026 មានផ្ទុកសារធាតុ DEXAMETHASONE និង PREDNISOLONE ដែលនាំឱ្យប៉ះពាល់ធ្ងន់ធ្ងរដល់សុខភាពរបស់អ្នកប្រើប្រាស់។

ដើម្បីការពារដល់សុខុមាលភាពប្រជាពលរដ្ឋ ក្រសួងសុខាភិបាល ក៏មានវិធានការ និងការណែនាំ គ្រឹះស្ថានអាហរ័ណ នីហរ័ណឱសថ គ្រួសារកក់ក្ដៅ ឯ.ក ដែលបាននាំចូល និងចែកចាយផលិតផលបំប៉នសុខភាព GINSENG PRO B/Bott./30Caps. និង GINSENG PRO B/Bott./60Caps. ត្រូវប្រមូលមកវិញនូវផលិតផលបំប៉នសុខភាពភាព GINSENG PRO B/Bott./30Caps. និង GINSENG PRO B/Bott./60Caps.ពីឱសថស្ថាន ឱសថស្ថានរងនានា និងទីផ្សារ ព្រមទាំងប្រព័ន្ធអនឡាញគ្រប់ប្រភេទ ក្នុងព្រះរាជាណាចកកម្ពុជា ដើម្បីកំទេចចោលតាមបច្ចេកទេសជាបន្ទាន់។

ទន្ទឹមនឹងនេះ ក្រសួងតម្រូវឱ្យគ្រឹះស្ថានអាហរ័ណ នីហរ័ណឱសថ គ្រួសារកក់ក្ដៅ ឯ.ក និងគ្រឹះស្ថានលក់ឱសថ (ឱសថស្ថាន) ទាំងអស់ត្រូវបញ្ឈប់ការលក់ផលិតផលបំប៉នសុខភាព GINSENG PRO B/Bott./30 Caps. និង GINSENG PRO B/Bott./60Caps. ចាប់ពីថ្ងៃចេញសេចក្តីជូនព័ត៌មាននេះតទៅ។

ក្រសួងសុខាភិបាលក៏បានអំពាវនាវដល់បងប្អូនប្រជាពលរដ្ឋទាំងអស់ត្រូវឈប់ទិញ និងប្រើប្រាស់ផលិតផលបំប៉នសុខភាព GINSENG PRO B/Bott./30 Caps. និង GINSENG PRO B/Bott./60Caps. ចាប់ពីថ្ងៃជូនព័ត៌មាននេះតទៅ។

ក្រសួងសុខាភិបាលនឹងមានវិធានការតឹងរ៉ឹងតាមផ្លូវច្បាប់ ចំពោះម្ចាស់គ្រឹះស្ថានអាហរ័ណ នីហរ័ណឱសថគ្រួសារកក់ក្តៅ ឯ.ក ម្ចាស់ឱសថស្ថាន ឱសថស្ថានរង និងបុគ្គលទាំងឡាយណាដែលនៅតែបន្តការលក់ផលិតផលបំប៉នសុខភាព GINSENG PRO B/Bott./30 Caps. និង GINSENG PRO B/Bott./60Caps.។

ក្នុងករណីបងប្អូនត្រូវការព័ត៌មានបន្ថែមពីនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាង សូមទំនាក់ទំនងតាមរយៈលេខទូរស័ព្ទ៖ ០១១ ៥៧៤ ៧៨៧, ០១២ ៣៥៥ ១៦១, ០១២ ៩៨៣ ៣៣៤, ០១៧ ៨៦៦ ៧៦០។ នេះបើតាមការបញ្ជាក់របស់ក្រសួងសុខាភិបាល៕