ក្រសួង-ស្ថាប័ន១៣ បានតាំងបង្ហាញផលិតផលកម្ពុជា​ ក្នុងកម្មវិធី«ពិព័រណ៍អាស៊ាន-ចិន»

ចិន៖ ក្រសួង-ស្ថាប័នពាក់ព័ន្ធ និងអាជីវករ បានរៀបចំ និងនាំយកផលិតផលរបស់កម្ពុជា​ ទៅតាំងបង្ហាញដល់សាធារណជន ក្នុងកម្មវិធី «ពិព័រណ៍អាស៊ាន-ចិន លើកទី២០»​ ដែលត្រូវបានរៀបចំឡើងចាប់ពីថ្ងៃទី១៧-១៩ កញ្ញា នៅទីក្រុងណាននីង ខេត្តក្វាងស៊ី ប្រទេសចិន។

តាមរយៈកម្មវិធី «ពិព័រណ៍អាស៊ាន-ចិន លើកទី២០» បានរួមចំណែកលើកកម្ពស់កិត្យានុភាព និងវប្បធម៌ជាតិ នៅលើឆាកអន្តរជាតិ តាមរយៈការតាំងបង្ហាញដល់ប្រជាជនបរទេស ឱ្យបានស្គាល់ផលិតផលខ្មែរ ក៏ដូចជាដើម្បីជំរុញសក្តានុពលវិនិយោគសម្រាប់កម្ពុជា។ មួយវិញទៀត ព្រឹត្តិការណ៍នេះ បានដើរតួនាទីសំខាន់ក្នុងការបង្កើនទំហំពាណិជ្ជកម្មអាស៊ាន-ចិន ឱ្យកាន់តែមានសន្ទុះខ្ពស់ឡើង ជាពិសេសក្នុងបរិបទនៃការងើបឡើងចេញពីវិបត្តិនៃជំងឺកូវីដ-១៩។

សូមបញ្ជាក់ថា ក្រសួង-ស្ថាប័នពាក់ព័ន្ធ ដែលបានចូលរួម ពិព័រណ៍អាស៊ាន-ចិន រួមមាន ក្រសួងពាណិជ្ជកម្ម ក្រសួងទេសចរណ៍ ក្រុមប្រឹក្សាអភិវឌ្ឍន៍កម្ពុជា ក្រសួងការបរទេស និងសហប្រតិបត្តិការអន្តរជាតិ ក្រសួងវប្បធម៌ និងវិចិត្រសិល្បៈ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ក្រសួងកសិកម្ម រុក្ខាប្រមាញ់ និងនេសាទ សាលារាជធានីភ្នំពេញ ស្ថានទូតកម្ពុជាប្រចាំប្រទេសចិន ក្រសួងសេដ្ឋកិច្ច និងហិរញ្ញវត្ថុ ក្រសួងរ៉ែ និងថាមពល សភាពាណិជ្ជកម្ម និង វិស័យឯកជនកម្ពុជា មកចូលរួមតាំងពិព័រណ៍ (សហគ្រាសធុនតូច និងមធ្យម)៕