កម្មវិធី«ពិពណ៌រុក្ខជាតិ និងសួនច្បារភ្នំពេញ»លើកទី២ ប្រព្រឹត្តទៅនៅថ្ងៃទី១៦ និង១៧ កញ្ញា

ភ្នំពេញ៖ Phnom Penh Houseplant Festival រៀបចំកម្មវិធី ពិពណ៌រុក្ខជាតិ និងសួនច្បារភ្នំពេញលើកទី២ នៅទីតាំង Friends Futures Factory នៅថ្ងៃទី១៦ និង១៧ កញ្ញា ឆ្នាំ២០២៣ ពីម៉ោង ១០ ព្រឹក រហូតដល់ម៉ោង ៧ ល្ងាច សម្រាប់អ្នកដែលស្រលាញ់ចូលចិត្តរុក្ខជាតិ។

បើតាមគេហទំព័រហ្វេសប៊ុក Phnom Penh Houseplant Festival បានឱ្យដឹងថា ពិព័រណ៍រុក្ខជាតិ និងសួនច្បារភ្នំពេញលើកទី២ ជាព្រឹត្តិការណ៍សាធារណៈមួយដែលត្រូវបានរៀបចំឡើងដើម្បីអ្នកស្រលាញ់រុក្ខជាតិ និងចង់ស្វែងយល់អំពីរុក្ខជាតិ បានជួបជុំគ្នា ចែករំលែកចំណេះដឹង ផ្លាស់ប្ដូរបទពិសោធន៍ និងជម្រុញលើកទឹកចិត្តសាធារណជនឲ្យយល់ដឹងបន្ថែមអំពីរុក្ខជាតិ សួនច្បារ និងលំហរបៃតងក្នុងទីប្រជុំជន។

កម្មវិធីពិពណ៌រុក្ខជាតិ និងសួនច្បារភ្នំពេញលើកទី២ រៀបចំឡើងដោយ Phnom Penh Houseplant Festival ក្រោមការគាំទ្រពី Friends Futures Factory ដែលនឹងរៀបចំឡើង តាមកាលបរិច្ឆេទនៅថ្ងៃទី ១៦ និង ១៧ ខែកញ្ញា ឆ្នាំ២០២៣។

គួរបញ្ជាក់ផងដែរថា កម្មវិធីនេះនឹងមានការចូលរួមពីអ្នកលក់រុក្ខជាតិលម្អជាច្រើនប្រភេទដូចជា រុក្ខជាតិដំបងយក្ស ប្រទាល រុក្ខជាតិលម្អស្លឹក កេសកូល អ្នករៀបចំសួនច្បារ និងទេសភាព អ្នកលក់ផលិតផលកសិកម្ម ពិព័រណ៍សិល្បៈអំពីរុក្ខជាតិ សិក្ខាសាលាអំពីរុក្ខជាតិ និងការសម្ដែងពីសិល្បករជាច្រើននាក់។ ក្រៅពីនេះកម្មវិធីក៏មានជាតូបលក់ភេសជ្ជៈ ទឹកផ្លែឈើ កាហ្វេ ម្ហូបជាច្រើនមុខ និងផលិតផលដែលផលិតក្នុងស្រុក ដូចជាស្មូន សិល្បៈ គ្រឿងអលង្ការ ត្បូងជាដើម៕