យុវតី រុនណាត ដេបូរ៉ា ធ្លាប់ចូលរួមកម្មវិធី «តំណាងយុវជនកម្ពុជា» ក្នុងប្រទេសចំនួន ៣ ត្រឹមវ័យ១៧ឆ្នាំ

ភ្នំពេញ៖ យុវតី រុនណាត ដេបូរ៉ា ដែលទើបបានចូលរួមតំណាងកម្ពុជា ក្នុងកម្មវិធីអ្នកដឹកនាំយុវជនអាស៊ី ជាមួយនឹងយុវជន ៦រូបផ្សេងទៀត នៅប្រទេសជប៉ុន ធ្លាប់បានចូលរួមកម្មវិធីនៅប្រទេសសិង្ហបុរី និងកូរ៉េខាងត្បូងដើម្បីតំណាងយុវជនកម្ពុជាក្នុងកម្មវិធីអន្តរជាតិ និងចូលរួមសកម្មភាពសង្គមជាច្រើនជាមួយនឹងយុវជនផ្សេងទៀតទាំងក្នុង និងក្រៅប្រទេស។

យុវតី រុនណាត ដេបូរ៉ា ដែលជាសិស្សថ្នាក់ទី១២ ដែលនឹងប្រលងនាពេលខាងមុខនេះ បានថ្លែងប្រាប់ស៊ីស៊ីថាមស៍ថា កាលពីថ្មីៗនេះ កញ្ញាបានចូលរួមកម្មវិធី អ្នកដឹកនាំយុវជនអាស៊ី ដែលមានការចូលរួមពីប្រទេសផ្សេងៗនៅអាស៊ី និងប្រទេសជប៉ុន ប្រព្រឹត្តទៅនៅលើទឹកដីទីក្រុងតូក្យូនៃប្រទេសជប៉ុន ដែលមានជួបជាមួយនឹងសំណាក់ថ្នាក់ដឹកនាំផ្សេងៗដែលផ្តល់ឱកាសឱ្យយុវជនមកពីប្រទេសទាំងអស់នេះក្នុងការធ្វើការងារជាក្រុមដើម្បីសិក្សាពីបញ្ហាប្រឈម និងដំណោះស្រាយពាក់ព័ន្ធនឹងបញ្ហាការប្រែប្រួលអាកាសធាតុដោយការបំភាយឧស្ម័ន និងការផលិតអាហារផ្សេងៗផងដែរ។

បើតាម យុវតី ដេបូរ៉ា បានឱ្យដឹងថា យុវតីដ៏ពូកែរូបនេះ ធ្លាប់មានបទពិសោធន៍ជាច្រើនមុននឹងបានចូលរួមកម្មវិធីនៅប្រទេសជប៉ុននេះ ដោយ ដេបូរ៉ា ធ្លាប់បានចូលរួមការងារស្ម័គ្រចិត្តផ្សេងក្នុងការរៀបចំកម្មវិធី ប្រកួតការជជែកដេញដោល ប្រកួតពានរង្វាន់សហគ្រិនវ័យក្មេង រួមទាំងចូលរួមការងារជាមួយនឹងការតំណាងប្រទេសក្នុងឆាកអន្តរជាតិផងដែរ ដែលជាកាតាលីករបណ្តុះស្មារតី យុវតីរូបនេះក្នុងការបន្តធ្វើសកម្មភាពជាបន្តបន្ទាប់ដើម្បីមានឱកាសបានចូលរួមចំណែកមកកាន់សង្គមបានកាន់តែច្រើន។

ថ្វីត្បិតតែឆ្នាំនេះ ជាឆ្នាំដែល ដេបូរ៉ា ត្រូវមានការប្រលងបាក់ឌុបក៏ដោយ វាមិនបានរារាំងឆន្ទៈរបស់យុវតីក្នុងការចូលរួមការងារផ្សេងៗក្រៅពីការសិក្សាក្នុងសាលានោះឡើយ គឺ ដេបូរ៉ា បានដាក់ពាក្យទៅកាន់អគ្គនាយកដ្ឋានយុវជនចូលរួមកម្មវិធីអ្នកដឹកនាំយុវជនអាស៊ី រហូតត្រូវបានជ្រើសរើសចូលរួមតំណាងប្រទេសកម្ពុជាជាមួយនឹងយុវជន ៦រូបផ្សេងទៀត ទៅប្រទេសជប៉ុនដោយជោគជ័យ។

មុននឹងបានចូលរួមតំណាងកម្មវិធីចូលរួមនៅប្រទេសជប៉ុន ដេបូរ៉ា ធ្លាប់តំណាងយុវជនកម្ពុជាចូលរួមនៅក្នុងកម្មវិធី Asian Science Camp 2023 ( ASC ) នៅប្រទេសកូរ៉េ និង កម្មវិធី Global Space and Technology Convention 2023 នៅប្រទេសសិង្ហបុរី។ បន្ថែមពីនេះ យុវតីរូបនេះធ្លាប់បានពានរង្វាន់ជាច្រើនពីកម្មវិធីប្រកួតប្រជែង ដូចជា Business Model Competition 2023 ( BMC ) , និងKhmer Enterprise High School Award 2022 ផងដែរ។

យុវតីវ័យ ១៧ ឈានចូល១៨ឆ្នាំរូបនេះ បានបន្តទៀតថា ខ្លួនបានចូលរួមកម្មវិធីផ្សេងៗក្រៅពីរៀននៅក្នុងសាលាតាំងពីឆ្នាំ២០២១មកម្ល៉េះ ដោយមានគោលបំណងក្នុងការបង្កើនទំនាក់ទំនងជាមួយនឹងមនុស្សជុំវិញខ្លួនឱ្យបានច្រើនដើម្បីពង្រឹងសមត្ថភាពក្នុងការទំនាក់ទំនង និងរៀនជំនាញថ្មីៗបន្ថែមទៀត ។ ការងារសង្គមដំបូងដែល យុវតីរូបនេះបានធ្វើ គឺធ្វើជាអ្នកបកប្រែភាសាអង់គ្លេស នៅក្នុងកម្មវិធីបោះជំរុំជាមួយជនជាតិកូរ៉េ ។

ជាចុងក្រោយ យុវតីរូបនេះ បានរៀបរាប់ប្រាប់ស៊ីស៊ីថាមស៍ថា ទៅថ្ងៃខាងមុខ កញ្ញាមានបំណងក្នុងការដាក់អាហារូបករណ៍ទៅរៀននៅក្រៅប្រទេស សិក្សាជំនាញគីមីចំណីអាហារ ដោយសារតែមានបំណងក្នុងការពង្រឹងវិស័យផ្នែកកសិកម្ម និងការផលិតអាហារនៅប្រទេសកម្ពុជាឱ្យកាន់តែមានភាពប្រសើរឡើងដោយផ្សារភ្ជាប់ជាមួយនឹងបច្ចេកវិទ្យាថ្មីៗ និងលើកតម្កើងផលិតផលក្នុងស្រុកដែលមានគុណភាពខ្ពស់ផងដែរ៕