វៀតណាម៖ ប្រទេសវៀតណាមបានបដិសេធការចោទប្រកាន់មិនពិតរបស់អង្គការខ្មែរកម្ពុជាក្រោមដោយនិយាយថា ប្រជាជនខ្មែរក្នុងប្រទេសវៀតណាមត្រូវបានវៀតណាមចាត់ទុកដោយមិនស្មើភាព និងមិនផ្តល់ឱកាសសម្រាប់ការអភិវឌ្ឍន៍លើគ្រប់វិស័យដល់ពលរដ្ឋកម្ពុជាក្រោមឡើយ។ នេះបើយោងតាមការចុះផ្សាយរបស់កាសែតវៀតណាម VN Express។
អ្នកនាំពាក្យក្រសួងការបរទេសវៀតណាមលោកស្រី Pham Thu Hang បានឲ្យដឹងថា "ប្រជាជនខ្មែរគឺជាជនជាតិមួយដែលមិនអាចបំបែកបាននៃជនជាតិចំនួន ៥៤ របស់វៀតណាម ដែលសុទ្ធតែរស់នៅដោយសុខដុមរមនាស្មើភាពគ្នាក្នុងប្រទេសវៀតណាម ហើយទាំងអស់បានរួមចំណែកដល់ការអភិវឌ្ឍន៍ និងការការពារប្រទេសពេញមួយប្រវត្តិសាស្ត្រ"។អ្នកស្រីបានឆ្លើយតបនឹងការសាកសួររបស់អ្នកសារព័ត៌មានលើអង្គការខ្មែរកម្ពុជាក្រោមដែលបានចោទប្រកាន់មិនពិតអំពីស្ថានភាពប្រជាពលរដ្ឋខ្មែរនៅប្រទេសវៀតណាម។
ទស្សនាវដ្ដី Tuyen Giao នៃនាយកដ្ឋានឃោសនាមជ្ឈិមបានរាយការណ៍ថា ថ្មីៗនេះ កងកម្លាំងអរិភាពរបស់អង្គការខ្មែរកម្ពុជាក្រោម បានធ្វើសកម្មភាពប្រឆាំងរដ្ឋលើវិស័យជាច្រើន ជាពិសេសជនជាតិ និងសាសនានៅខេត្តត្រាវិញ ភាគខាងត្បូងប្រទេសវៀតណាម ដែលជាកន្លែងរស់នៅរបស់សហគមន៍ខ្មែរដ៏ធំមួយ។
កាសែតដដែលសរសេរថាពួកគេបានឆ្លៀតយកប្រយោជន៍ពីព្រឹត្តិការណ៍មួយចំនួន រួមទាំងព័ត៌មានជនជាតិ និងសាសនា ដើម្បីប្រឌិតការចោទប្រកាន់ថា "រដ្ឋបាលវៀតណាមចង់ឱ្យអាជ្ញាធរមូលដ្ឋានលុបបំបាត់វប្បធម៌ខ្មែរ" និងដើម្បីអនុវត្ត "គោលនយោបាយបង្រួបបង្រួមជាតិ" ប្រឆាំងនឹងជនជាតិខ្មែរ។ កាសែតដដែលបន្តទៀតថា អង្គការខ្មែរកម្ពុជាក្រោមបញ្ចុះបញ្ចូលមនុស្សឱ្យចូលរួមក្នុងក្រុមដោយបោះពុម្ពឯកសារប្រឌិត ដោយចោទប្រកាន់ថា ជនជាតិវៀតណាមរើសអើង និងជិះជាន់ប្រជាពលរដ្ឋខ្មែរ ហើយសិទ្ធិប្រជាពលរដ្ឋខ្មែរមានកម្រិតយ៉ាងតិចតួចបំផុត។
សម្រាប់លោកស្រី Pham Thu Hang ព័ត៌មានដែលផ្តល់ដោយខ្មែរកម្ពុជាក្រោម គឺគ្មានមូលដ្ឋាន និងមិនពិត លោកស្រីអះអាងថាជនជាតិទាំងអស់ក្នុងប្រទេសវៀតណាម ត្រូវបានចាត់ទុកស្មើៗគ្នា និងត្រូវបានធានាដោយរដ្ឋ ដើម្បីមានឱកាសអភិវឌ្ឍលើគ្រប់វិស័យ៕
