កូនផ្សោតកើតថ្មី អាយុប្រមាណពីរសប្តាហ៍ ត្រូវបានប្រទះឃើញនៅអន្លង់កាំពី

ក្រចេះ៖ កូនផ្សោតកើតថ្មី ដែលមានអាយុប្រមាណ២សប្ដាហ៍ ត្រូវបានប្រទះឃើញដោយអ្នកបើកទូកទេសចរណ៍ក្នុងពេលកំពុងជូនភ្ញៀវទេសចរកំសាន្ត កាលពីថ្ងៃទី២១ ខែសីហា ឆ្នាំ២០២៣ នៅអន្លង់កាំពី ក្នុងស្រុកសំបូរ ខេត្តក្រចេះ។ កូនផ្សោតថ្មីនេះ បានប្រទះឃើញហែលជាមួយសត្វផ្សោតពេញវ័យចំនួន ប្រាំពីរក្បាលផ្សេងទៀត។

គួរបញ្ជាក់ថា កូនផ្សោតនេះជាកូនផ្សោតទីប្រាំមួយហើយដែលបានកត់ត្រាក្នុងឆ្នាំ២០២៣នេះ។ សត្វផ្សោតទន្លេមេគង្គ ត្រូវបានចាត់ថ្នាក់ក្នុងបញ្ជីក្រហមរបស់អង្គការIUCN ជាប្រភេទសត្វរងគ្រោះថ្នាក់ជិតផុតពូជបំផុត ដែលនេះជាចំណាត់ថ្នាក់នៃប្រភេទគំរាមកំហែងខ្ពស់បំផុតជាសកលសម្រាប់ប្រភេទសត្វជិតផុតពូជ៕