ភ្នំពេញ៖ លោកស្រី ចម និម្មល ជាតំណាងរាស្ត្រស្រ្តី ដែលមានវ័យក្មេងជាងគេបំផុតក្នុងចំណោមឥស្សរជនស្ត្រីផ្សេងទៀតដែលបានជាប់ជាតំណាងរាស្ត្រសម្រាប់អាណត្តិទី៧ ដែលមានវ័យត្រឹមតែ ៤៣ឆ្នាំប៉ុណ្ណោះ។ លោកស្រី ចម និម្មល ជាបញ្ញវន្តខ្មែរមួយរូបដែលបានបញ្ចប់ការសិក្សានៅសហរដ្ឋអាមេរិក ជំនាញ សេដ្ឋកិច្ចអន្តរជាតិ និងវិទ្យាសាស្ត្រសង្គម។
លោកស្រី ចម និម្មល កើតនៅថ្ងៃទី១៨ ខែឧសភា ឆ្នាំ១៩៨០ ជារដ្ឋលេខាធិការក្រសួងពាណិជ្ជកម្ម និងជាកូនស្រីបង្កើត របស់លោក ចម ប្រសិទ្ធិ ទេសរដ្ឋមន្ត្រី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានិវត្តន៍។ លោកស្រី បានចូលបម្រើការនៅក្រសួងពាណិជ្ជកម្ម ជាង២០ឆ្នាំមកហើយ។
ក្នុងនាមជាស្ត្រីមានតួនាទីក្នុងរដ្ឋាភិបាលមួយរូប វត្តមានរបស់លោកស្រី ជាផ្នែកមួយធ្វើឱ្យកម្ពុជាមានការអភិវឌ្ឍ។ ជាពិសេស លោកស្រី បានលើកស្ទួយដល់ស្ត្រីក្នុងភាពជាអ្នកដឹកនាំ និងបង្ហាញឱ្យឃើញពីថាមពលរបស់ស្ត្រីក្នុងការចូលរួមចំណែកដឹកនាំប្រទេសផងដែរ។
កាលពីថ្ងៃទី០៥ ខែសីហា ឆ្នាំ២០២៣កន្លងទៅ គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសពីបេក្ខជនជាប់ឆ្នោតជាតំណាងរាស្ត្រសម្រាប់អាណត្តិទី៧ សរុបទាំងអស់មាន ១២៥ រូប។ ក្នុងចំណោមបេក្ខជនទាំង ១២៥រូបនោះ មានតំណាងរាស្ត្រជាស្រ្តីចំនួន ១៦រូប បានជាប់ដែលសុទ្ធតែជាឥស្សរជនឆ្នើម និងមានសមត្ថភាពក្នុងការដឹកនាំប្រទេសជាតិ។ លោកស្រី ចម និម្មល គឺជាស្រ្តីម្នាក់ដែលជាប់ជាតំណាងរាស្ត្រនៅខេត្តកំពត និងមានវ័យក្មេងជាងគេ៕
