ភ្នំពេញ៖ មូលនិធិការស្រាវជ្រាវ គំនិតច្នៃប្រឌិត និងនវានុវត្តន៍ នៃក្រសួងអប់រំ សហការជាមួយអង្គការស្ទែមកម្ពុជា រៀបចំព្រឹត្តិការណ៍ប្រកួតប្រជែង «ភាពច្នៃប្រឌិតលើការរចនាផលិតផលមេកាត្រូនិចកម្រិតមធ្យមសិក្សា»។ កាលបរិច្ឆេទ ផុតកំណត់ទទួលពាក្យ ថ្ងៃទី២៧ ខែសីហា ២០២៣។
តាមរយៈព្រឹត្តិការណ៍នេះ ជាការផ្តល់ឱកាសដល់សិស្សានុសិស្ស ដែលកំពុងសិក្សានៅគ្រឹះស្ថានមធ្យមសិក្សាសាធារណៈ និងឯកជនទាំងអស់ អាចបញ្ចេញស្នាដៃ និងសមត្ថភាព ឬភាពប៉ិនប្រសប់របស់ខ្លួនជាសាធារណៈទៅលើ ភាពវៃឆ្លាត (ingenuity) ភាពច្នៃប្រឌិត (creativity) គុណប្រយោជន៍សំរាប់ប្រើប្រាស់ (utility) រូបរាង សណ្ឋាន ឬទម្រង់ (form) និងការបង្កើតមុខងារ (Function)។ សម្រាប់ការចូលរួម ព្រឹត្តិការណ៍ប្រកួតប្រជែង នេះ សូមចូលទៅកាន់ https://shorturl.at/frxOW ។
ដើម្បីចូលរួមព្រឹត្តិការណ៍ប្រកួតប្រជែង «ភាពច្នៃប្រឌិតលើការរចនាផលិតផលមេកាត្រូនិចកម្រិតមធ្យមសិក្សា» សិស្សានុសិស្ស ត្រូវបំពេញលក្ខខណ្ឌដែលបានកំណត់ដូចជា សិស្សានុសិស្ស ដែលកំពុងសិក្សានៅគ្រឹះស្ថានមធ្យមសិក្សាសាធារណៈ និងឯកជន (កម្រិតថ្នាក់ទី៧ ដល់ថ្នាក់ទី១២) ហើយសិស្សានុសិស្សអាចចូលរួមប្រកួតនៅក្នុងព្រឹត្តិការណ៍នេះ ជាការបង្កើតជាក្រុម។ ក្រុមនីមួយៗអាចជាមិត្តរួមថ្នាក់ ឬមិត្តរួមសាលារៀន តែក្រុមនីមួយៗមិនត្រូវមានសមាជិកលើសពី៥នាក់ទេ
បន្ថែមពីនេះ សិស្សានុសិស្សនៅគ្រឹះស្ថានសិក្សារដ្ឋនិងឯកជន ដែលមានបំណង ចូលរួមក្នុងព្រឹត្តិការណ៍នេះ ត្រូវកំណត់ គម្រោងលើការរចនាផលិតផលមេកាត្រូនិច និងត្រូវផ្សារភ្ជាប់ប្រធានបទគម្រោង ទៅនឹងបញ្ហាជាក់លាក់ណាមួយដែល មាននៅក្នុងសង្គមនិងជីវភាពប្រចាំថ្ងៃ។ បញ្ហានៅក្នុងសង្គមនិងជីវភាពប្រចាំថ្ងៃ ត្រូវមាន ភាពជាក់លាក់ មានទំហំសមស្របដែលអាចឆ្លើយតបជាមួយគម្រោង៕
