រាជរដ្ឋាភិបាលនឹងរៀបចំបុណ្យអុំទូកនៅមុខវាំងចាប់ពីថ្ងៃទី២៦-២៨ខែវិចិ្ឆកា ឆ្នាំ២០២៣

ភ្នំពេញ៖ រាជរដ្ឋាភិបាល នឹងរៀបចំពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅតាមដងទន្លេសាប មុខព្រះបរមរាជវាំង ចាប់ពីថ្ងៃទី២៦-២៨ខែវិចិ្ឆកា ឆ្នាំ២០២៣ ដើម្បីបើកឱកាសឱ្យប្រជារាស្ត្រ បានចូលរួមកម្សាន្តបុណ្យប្រពៃណីជាតិខ្មែរ ដោយមាន បណ្តែតប្រទីប អុជកាំជ្រួច ប្រគំតន្ត្រីសម័យ-បុរាណ និងសម្ដែងសិល្បៈ ទាំង៣រាត្រី។

ពិធីបុណ្យអុំទូក នឹងប្រព្រឹត្តទៅនៅថ្ងៃទី២៦-២៨ ខែវិច្ឆិកា ឆ្នាំ២០២៣ នៅតាមដងទន្លេសាប មុខព្រះបរមរាជវាំង ដើម្បីបើកឱកាសឱ្យប្រជារាស្ត្រ ចូលរួមកម្សាន្តសប្បាយរីករាយ អបអរសាទរបុណ្យប្រពៃណីជាតិខ្មែរយើង ដែលមានតាំងពីបរមបុរាណដ៏យូរលង់មកហើយ ដោយមាន បណ្តែតប្រទីប អុជកាំជ្រួច ប្រគំតន្ត្រីសម័យ-បុរាណ និងសម្ដែងសិល្បៈ ទាំង៣រាត្រី។

ដើម្បីរៀបចំព្រះរាជពិធីបុណ្យនេះឱ្យអធិកអធម ស្របទៅតាមប្រពៃណីជាតិ និង ការអភិវឌ្ឍសេដ្ឋកិច្ចរបស់ប្រទេសជាតិ គណៈកម្មាធិការ ជាតិរៀបចំបុណ្យជាតិ-អន្តរជាតិ ស្នើឱ្យស្ថាប័នពាក់ព័ន្ធ ត្រូវតុបតែងលម្អទង់ជាតិ ទង់សាសនា ទង់ព្រះមហាក្សត្រ បដាពាក្យស្លោក អាហ្វីស ប៉ាណូ និងបំភ្លឺភ្លើងពណ៌ ជាដើម៕