លោក ហ៊ុន ម៉ាណែត ប្ដេជ្ញា«បម្រើជាតិ មាតុភូមិ និងប្រជាជនកម្ពុជា»

ភ្នំពេញ៖ លោក ហ៊ុន ម៉ាណែត ប្ដេជ្ញាចិត្តទទួលខុសត្រូវខ្ពស់ ក្នុងការបម្រើជាតិ មាតុភូមិ និងប្រជាជនកម្ពុជា ពិសេស ការបន្តធានាការពារឯករាជ្យជាតិ អធិបតេយ្យជាតិ និងបូរណភាពទឹកដី។ នេះបើតាមការបង្ហោះសាររបស់លោក បន្ទាប់ពីព្រះមហាក្សត្រ ចេញព្រះរាជក្រឹត្យចាត់តាំងលោក ជានាយករដ្ឋមន្ត្រី សម្រាប់នីតិកាលទី៧ នៃរដ្ឋសភា នាថ្ងៃទី៧ សីហា ឆ្នាំ២០២៣។

ជាមួយនឹងព្រះរាជហឫទ័យជឿទុកចិត្តពីព្រះមហាក្សត្រ លោក ហ៊ុន ម៉ាណែត ប្តេជ្ញាខិតខំបំពេញបេសកកម្មជាតិដ៏ឧត្តុង្គឧត្តមថ្លៃថ្លានេះ ប្រកបដោយវីរភាព, សេចក្តីស្មោះត្រង់ និងការទទួលខុសត្រូវខ្ពស់ ក្នុងការបម្រើជាតិ មាតុភូមិ និងប្រជាជនកម្ពុជា។ ជាពិសេស ការបន្តធានាការពារឯករាជ្យជាតិ អធិបតេយ្យជាតិ និងបូរណភាពទឹកដី, ការធានាការពារជាដាច់ខាត់នូវរាជបល្ល័ង្ក និងរបបរាជានិយមអាស្រ័យរដ្ឋធម្មនុញ្ញនៅកម្ពុជា។

លើសពីនេះ លោក ហ៊ុន ម៉ាណែត នឹងបន្តធានាការពារឱ្យបានដាច់ខាតនូវសុខសន្តិភាព និងស្ថិរភាពសង្គមជាតិ, ការបន្តជំរុញការអភិវឌ្ឍប្រទេសជាតិឱ្យមានការរីកចម្រើនជឿនលឿន និងការបន្តលើកកម្ពស់ជីវភាពរស់នៅរបស់ប្រជាជនកម្ពុជា ក៏ដូចជាការបន្តលើកស្ទួយកិត្យានុភាពជាតិនៅលើឆាកអន្តរជាតិ។

គួរបញ្ជាក់ថា លោក ហ៊ុន ម៉ាណែត ត្រូវបានព្រះមហាក្សត្រ ចេញព្រះរាជក្រឹត្យចាត់តាំង ជានាយករដ្ឋមន្ត្រី សម្រាប់នីតិកាលទី៧ នៃរដ្ឋសភា នាថ្ងៃទី៧ សីហា ឆ្នាំ២០២៣ នេះ៕