ភ្នំពេញ៖ អង្គការទិន្នន័យអំពីការអភិវឌ្ឍ (អូឌីស៊ី) កាលពីថ្ងៃទី ០២ ខែសីហា ឆ្នាំ ២០២៣ បានចេញនូវសេចក្តីប្រកាសព័ត៌មានមួយស្តីពីថវិកាក្នុងការផលិតសាច់រឿងសម្រាប់អ្នកសារព័ត៌មានក្រោមប្រធានបទគណនេយ្យភាពសង្គមនឹងបិទទួលពាក្យនៅថ្ងៃទី២០ សីហា ឆ្នាំ២០២៣។
យោងតាមសេចក្តីប្រកាសព័ត៌មានរបស់អូឌីស៊ី បានបង្ហាញឱ្យឃើញថាអង្គការទិន្នន័យអំពីការអភិវឌ្ឍ (អូឌីស៊ី) សហការជាមួយអង្គការ Internews តាមរយៈគម្រោងការច្នៃប្រឌិតថ្មីសម្រាប់គណនេយ្យភាពសង្គមនៅកម្ពុជា (ISAC) នឹងផ្តល់ថវិកាសម្រាប់ផលិតសាច់រឿងដល់អ្នកសារព័ត៌មានក្នុងការផលិតអត្ថបទរឿងដោយផ្អែកលើទិន្នន័យដែលផ្សារភ្ជាប់ទៅនឹងគណនេយ្យភាពសង្គមនៅប្រទេសកម្ពុជា។
បើតាមសេចក្តីណែនាំនៃការប្រកួតនេះបានឱ្យដឹងថា ប្រធានបទនៃសាច់រឿងត្រូវតែពាក់ព័ន្ធនឹងមូលបទគណនេយ្យសង្គមក្នុងប្រទេសកម្ពុជា ហើយសាច់រឿងទាក់ទងនឹងសេវាទាំងបីដូចជា រដ្ឋបាលឃុំ សង្កាត់ សាលាបឋមសិក្សា និងមណ្ឌលសុខភាពត្រូវបានលើកទឹកចិត្តឱ្យសរសេរ ប៉ុន្តែមិនកំណត់ដាច់ខាតទេ។ សម្រាប់អ្នកដែលមានចំណាប់អារម្មណ៍អាចចូលចុះឈ្មោះតាមរយៈតំណភ្ជាប់ https://forms.gle/aoEcMH8gwb3Eg2U3A ។
លក្ខខណ្ឌដើម្បីចូលរួមបាន គឺត្រូវតែជាអ្នកសារព័ត៌មានដែលបម្រើការនៅប្រព័ន្ធផ្សព្វផ្សាយណាមួយ ឬ អ្នកសារព័ត៌មានឯករាជ្យ ដែលមានការប្តេជ្ញាចិត្ត និងមានពេលវេលាគ្រប់គ្រាន់ មានឆន្ទៈក្នុងការទទួលយក និងអនុវត្តតាមសេចក្តីណែនាំនៃការផលិតសាច់រឿង ដើម្បីផលិតសាច់រឿងជុំវិញគណនេយ្យភាពសង្គម នៅប្រទេសកម្ពុជាក្នុងរយៈពេលដែលបានកំណត់ ។
គួរបញ្ជាក់ផងដែរថា អត្ថប្រយោជន៍ដែលទទួលបានពីការប្រកួតមួយនេះមានដូចតទៅ បេក្ខជននឹងទទួលបានប្រាប់ឧបត្ថម្ភចំនួន១០០០ ដុល្លារ សម្រាប់ការផលិតសាច់រឿង ។ លើសពីនេះ អាចទទួលបានការគាំទ្រពីគ្រូបង្គោលផ្នែកទិន្នន័យ និងសាច់រឿង ដែលអាចពង្រីកចំណេះដឹងលើការផលិតអត្ថបទរឿងដោយផ្អែកលើទិន្នន័យ។ នៅពេលបានបញ្ចប់ការប្រកួត បេក្ខជននឹងត្រូវបានជួយគាំទ្រក្នុងការរចនារៀបចំអត្ថបទរឿងឱ្យមានលក្ខណៈអន្តរកម្ម នៅពេលធ្វើការផ្សព្វផ្សាយលើបណ្តាញផ្សព្វផ្សាយរបស់បេក្ខជន និងសារព័ត៌មាន CamboJA។
សម្រាប់លក្ខណៈវិនិច្ឆ័យ គឺអត្ថបទត្រូវតែពាក់ព័ន្ធនឹងមូលបទនៃសាច់រឿង ដែលពឹងផ្អែកលើទិន្នន័យ រួមទាំងមានលក្ខណៈជាការលើកកម្ពស់ការយល់ដឹង បង្កើតឱ្យមានការចួលរួម ទាក់ទាញការយកចិត្តទុកដាក់ បំផុសឱ្យមានការពិភាក្សា និងជម្រុញឱ្យមានសកម្មភាព ដែលសាច់រឿងត្រូវតែមានសត្យានុម័ត។
ការប្រកួតនឹងចាប់ផ្តើមទទួលពាក្យតាមអនឡាញពីថ្ងៃទី ០១ សីហា ២០២៣ រហូតដល់ថ្ងៃ២០ សីហា ២០២៣ ដែលនឹងមានការសម្ភាសនៅថ្ងៃទី២៧ សីហា ២០២៣។ ការផលិតសាច់រឿងនឹងត្រូវបានធ្វើឡើងចាប់ពីថ្ងៃទី៣១ សីហា រហូតដល់ ៣១ តុលា ២០២៣ សម្រាប់អ្នកដែលជាប់វគ្គសម្ភាស៕
