មណ្ឌលគិរី៖ បញ្ហាភ្លៀងនូវប៉ុន្មានថ្ងៃនេះ បណ្ដាលឲ្យខូចខាតដំណាំកសិកម្ម លិចលង់ផ្ទះសម្បែង ផ្លូវជាតិ និងផ្លូវលំមួយចំនួន បង្កឲ្យអាកខានដល់ការធ្វើដំណើរផងដែរ។ ជាពិសេស ផ្លូវជាតិលេខ៧៦A ចន្លោះពីស្រុកអូររាំង ទៅស្រុកកែវសីមា (ចំណុចអូរងើយ) ដែលផ្លូវត្រូវបានកាត់ផ្តាច់ និងខូចខាតទាំងស្រុងមិនអាចធ្វើដំណើរបានគ្រប់មធ្យោបាយយានយន្តគ្រប់ប្រភេទ។
ស្រុកកោះញែក នៅត្រង់ចំណុចស្ពានអូរជីមៀត បានស្រកចុះឃើញតួស្ពានបេឡេត៍ (អាចធ្វើចរាចរណ៍ឆ្លងកាត់ទៅមកបានចំពោះម៉ូតូ និងរថយន្តធុនតូច)។ ចំណែកឯ ស្រុកកែវសីមា ជំនន់ទឹកភ្លៀង បានជន់លិចចំនួន ៣ឃុំ មាន ឃុំស្រែឈូក ឃុំស្រែខ្ទុម និងឃុំស្រែព្រះ។ ក្នុងនោះផ្ទះប្រជាពលរដ្ឋចំនួន ៨១ខ្នងផ្ទះ បានជន់លិច និង ខូចខាតដំណាំកសិកម្មចំនួន ៨២ ហិកតា។ រហូតមកដល់បច្ចុប្បន្ននេះទឹកបានស្រកចុះមកនៅកម្រិតធម្មតាវិញ។
បន្ថែមពីនេះ ស្រុកអូររាំង ទឹកបានហូរច្រោះបណ្តាលឱ្យមានការបាក់ស្រុតផ្លូវ និងដាច់ផ្លូវនៅចន្លោះគីឡូម៉ែត្រលេខ៩១ ដល់គីឡូម៉ែត្រលេខ៩៩ ផ្លូវជាតិលេខ៧៦A ចន្លោះពីស្រុកអូររាំង ទៅស្រុកកែវសីមា (ចំណុចអូរងើយ) ដែលផ្លូវត្រូវបានកាត់ផ្តាច់ និងខូចខាតទាំងស្រុងមិនអាចធ្វើដំណើរបានគ្រប់មធ្យោបាយយានយន្តគ្រប់ប្រភេទ៕
