វ៉ាស៊ីនតោន៖ ក្រសួងការបរទេសអាម៉េរិកបានគូសបញ្ជាក់ថាថាសហរដ្ឋអាម៉េរិកបានអញ្ជើញជាផ្លូវការនូវរដ្ឋមន្ត្រីការបរទេសដែលទើបតែងតាំងថ្មីរបស់ប្រទេសចិន គឺលោក Wang Yi ទៅកាន់ទីក្រុងវ៉ាស៊ីនតោន បន្ទាប់ពីអ្នកស្នងតំណែងមុនរបស់លោក Wang ត្រូវបានដកចេញពីមុខតំណែងភ្លាមៗដោយទីក្រុងប៉េកាំង។
ប្រទេសចិនបានតែងតាំងអ្នកការទូតជើងចាស់លោក Wang កាលពីសប្តាហ៍មុនដោយជំនួសអតីតរដ្ឋមន្រ្តីការបរទេសចិន Qin Gang ដែលមិនត្រូវបានគេឃើញអស់រយៈពេលជាងមួយខែ ដែលជាការអវត្តមានដ៏អាថ៌កំបាំងបន្ទាប់ពីបានចាប់ផ្តើមការងារត្រឹមតែប្រាំពីរខែ។ក្រសួងការបរទេសចិនបានត្រឹមតែបញ្ជាក់ថាលោក Qin ឈប់ធ្វើការដោយសារហេតុផលសុខភាព។
ការអញ្ជើញលោក Wang ត្រូវបានធ្វើក្នុងអំឡុងកិច្ចប្រជុំនៅក្រសួងការបរទេសរវាងឧបការីរដ្ឋមន្ត្រីការបរទេសអាម៉េរិកទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក លោក Daniel Kritenbrink និងលោក Yang Tao អគ្គនាយកនៃកិច្ចការអាម៉េរិកខាងជើង និងអូសេអានី នៅក្រសួងការបរទេសចិន។
រដ្ឋមន្ត្រីការបរទេសអាម៉េរិក លោក Antony Blinken បានជួបជាមួយលោក Qin នៅថ្ងៃទី ១៨ ខែមិថុនា ក្នុងដំណើរទស្សនកិច្ចលើកដំបូងរបស់អ្នកការទូតកំពូលរបស់អាម៉េរិកទៅកាន់ប្រទេសចិនក្នុងរយៈពេល ៥ ឆ្នាំ។ ក្រសួងការបរទេសសហរដ្ឋអាម៉េរិកបានឲ្យដឹងថា ប្រមុខមន្រ្តីការទូតទាំងពីរបានធ្វើកិច្ចពិភាក្សា "ច្បាស់លាស់ សំខាន់ និងស្ថាបនា" ហើយ Blinken បានអញ្ជើញ Qin ទៅកាន់ទីក្រុងវ៉ាស៊ីនតោន ដើម្បីបន្តការពិភាក្សា។
លោក Blinken ក្រោយមកបានជួបលោក Wang នៅក្រៅកិច្ចប្រជុំថ្នាក់តំបន់មួយក្នុងទីក្រុងហ្សាកាតាក្នុងអវត្តមានរបស់ Qin ។លោក Wang អាយុ ៦៩ ឆ្នាំបានបម្រើការជារដ្ឋមន្ត្រីការបរទេសពីឆ្នាំ ២០១៣ -២០២២ ខណៈដែលទំនាក់ទំនងបានធ្លាក់ចុះជាមួយសហរដ្ឋអាម៉េរិករហូតដល់ចំណុចមួយដែលទីក្រុងប៉េកាំងបានពិពណ៌នាថាជាកម្រិតទាបបំផុតក្នុងប្រវត្តិសាស្រ្ត៕
