ក្រសួងអប់រំចំណាយថវិកា៧០លានដុល្លារ កែលម្អការអប់រំចំណេះទូទៅ

ភ្នំពេញ៖ ក្រសួងអប់រំ បានចំណាយថវិកា ៧០លានដុល្លារអាម៉េរិក ដើម្បីកែលម្អការអប់រំចំណេះទូទៅ ដោយចាប់ផ្តើមអនុវត្តពីឆ្នាំ២០២២ ដល់ ២០២៦។ នេះបើតាមសេចក្តីប្រកាសរបស់ក្រសួងអប់រំ នៅក្នុងកិច្ចប្រជុំពិនិត្យវឌ្ឍនភាព នៃការអនុវត្តន៍គម្រោងកែលម្អការអប់រំចំណេះទូទៅ ដើម្បីលើកទិសដៅបន្ដ។

គម្រោងកែលម្អការអប់រំចំណេះទូទៅមានសុពលភាព និងចាប់ផ្តើមអនុវត្តសកម្មភាពរបស់ខ្លួនតាំងពីឆ្នាំ២០២២ និងត្រូវបញ្ចប់នៅឆ្នាំ២០២៦។ ថវិកាសរុបរបស់គម្រោងគឺ ថវិកាកម្ចីរបស់ធនាគារពិភពលោក ចំនួន ៦០លានដុល្លារ ថវិកា GPE ចំនួន ៩,២៥លានដុល្លារ និងថវិកាបដិភាគរបស់រាជរដ្ឋាភិបាលចំនួន ១លានដុល្លារ ។

ដើម្បីអនុវត្តគំរោងនេះ ឱ្យមានប្រសិទ្ធិភាព លោក ហង់ជួន ណារ៉ុន រដ្ឋមន្រ្តីក្រសួងអប់រំ ជំរុញឱ្យមានការចុះទៅសាលាឱ្យបានជាប់លាប់ ការប្រជុំត្រីមាសរបស់គម្រោង គឺប្រជុំនៅសាលារៀនណាមួយ និងលើកទឹកចិត្តឱ្យនាយកសាលានិយាយពីបញ្ហាប្រឈមប្រាប់យើង ដើម្បីដោះស្រាយចំទិសដៅ។ ជាពិសេស ស្នើឱ្យមានការប្រជុំរួមគ្នា រវាងក្រសួង និងដៃគូដ៏ទៃទៀត ដើម្បីពិនិត្យពីការអនុវត្ត គម្រោងរួមគ្នា និងដោះស្រាយរួមគ្នា៕