ភ្នំពេញ៖ ប្រមុខរាជរដ្ឋាភិបាលកម្ពុជា សម្តេច ហ៊ុន សែន នៅល្ងាចថ្ងៃទី ២៣ កក្កដានេះ បានចាត់ទុកចំនួនអត្រាអ្នកចូលរួមបោះឆ្នោតជាង៨០ភាគរយ ក្នុងការបោះឆ្នោតនៅអាណត្តិទី៧នេះ បង្ហាញពីប្រជាពលរដ្ឋស្រឡាញ់សុខសន្តិភាព និងការអភិវឌ្ឍ ហើយផ្តើមដកខ្លួនចេញពីក្រុមគណបក្សដែលជាប់ព័ន្ធជាមួយក្រុមគណបក្សប្រឆាំងដែលមានលោក សម រង្ស៊ី នៅពីក្រោយខ្នង។
សម្តេច ហ៊ុន សែន បានហៅការបោះឆ្នោតនៅពេលនេះ គឺបង្ហាញពីភាពចាស់ទុំពីដំណើរការបោះឆ្នោតនៅកម្ពុជា ហើយក្រុមនយោបាយប្រឆាំងជ្រុលនិយមក្រៅប្រទេសនឹងត្រូវកាត់បន្ថយ។សម្រាប់សម្តេច ហ៊ុន សែន ក្រុមគាំទ្រក្នុងប្រទេសហើយចូលរួមចាញ់ការឃោសនា ត្រូវបានរាជរដ្ឋាភិបាលកំណត់អត្តសញ្ញាត ហើយក្រុមការងារកំពុងតាមដាននិងត្រួតពិនិត្យពីផ្លូវច្បាប់។
សម្តេច ហ៊ុន សែន បានផ្តល់ឱកាសដល់ប្រជាពលរដ្ឋដែលចាញ់បោកការឃោសនារបស់គណបក្សប្រឆាំងត្រូវចូលខ្លួនសារភាព ហើយមិនដូច្នេះទេនឹងត្រូវប្រឈមនឹងផ្លូវច្បាប់ដោយសារបំពានច្បាប់បោះឆ្នោត។
