យុវតី ឃួង ស៊ីណាម៉ាលីន ឈ្នះ«មេដាយមាស»ការប្រកួតបញ្ញាវន្តអន្តរជាតិ

ភ្នំពេញ៖ យុវតី ឃួង ស៊ីណាម៉ាលីន នាថ្ងៃទី១៩ កក្កដា បានចូលរួមប្រកួតកម្មវិធីបញ្ញាវន្តអន្តរជាតិ ឆ្នាំ២០២៣ នៅទីក្រុងសេអ៊ូល ប្រទេសកូរ៉េខាងត្បូង។ នៅក្នុងកម្មវិធីប្រកួតនេះ យុវតីរូបនេះ បានឈ្នះមេដាយមាស និង ទទួលបានពានរង្វាន់ចំណាត់ថ្នាក់លេខ៥ខាងតែងសេចក្តីជាក្រុម និង មេដាយមាស និងប្រាក់៤នៃវិញ្ញាសារប្រកួតផ្សេងៗទៀត ក្នុងចំណោមសិស្សានុសិស្សជាង ២០០០នាក់ មកពីបណ្តាប្រទេសជាង ២០។

យុវតី ឃួង ស៊ីណាម៉ាលីន បានជាប់នៅក្នុងការប្រកួតកម្មវិធីបញ្ញាវន្តអន្តរជាតិ ឆ្នាំ២០២៣ (World Scholar’s Cup ២០២៣) វគ្គពាក់កណ្ដាលផ្ដាច់ព្រ័ត្រ នឹងបន្ដទៅប្រកួតវគ្គផ្ដាច់ព្រ័ត្រ នៅសកលវិទ្យាល័យYale (Yale University) សហរដ្ឋអាម៉េរិក។ នៅក្នុងកម្មវិធីប្រកួតនេះ យុវតីរូបនេះ បានឈ្នះមេដាយមាស និង ទទួលបានពានរង្វាន់ចំណាត់ថ្នាក់លេខ៥ខាងតែងសេចក្តីជាក្រុម និងមេដាយមាសនិងប្រាក់៤នៃវិញ្ញាសារប្រកួតផ្សេងៗទៀត។

គួរបញ្ជាក់ថា ការប្រកួតបញ្ញាវន្តអន្តរជាតិ ធ្វើជាភាសាអង់គ្លេស និងធ្វើទៅលើ ០៤វិញ្ញាសារ។ វិញ្ញាសារទាំងនោះរួមមាន Team Debate (ការដេញដោលមតិ) Collaborative Writing (សរសេរអត្ថបទលើ ៣ ប្រធានបទ) Scholar's Challenge (សំណួរជ្រើសរើសអំពីចំណេះដឹងទូទៅ) និង Scholar's Bowl (សំណួរជ្រើសរើសអំពីចំណេះដឹងទូទៅ)។ ក្នុងនោះដែរ មានវិញ្ញាសារបី ដែលធ្វើជាក្រុម ហើយមួយក្រុមមានសមាជិក ០៣នាក់ ចំណែកឯវិញ្ញាសារ Scholar's Challenge ធ្វើជាលក្ខណៈបុគ្គល៕