ញូដេលី៖ ភ្លៀងមូសុងមិនឈប់ឈរជាច្រើនថ្ងៃបានសម្លាប់មនុស្សយ៉ាងហោចណាស់ ៦៦ នាក់នៅក្នុងប្រទេសឥណ្ឌា ដោយមានអ្នកទេសចរបរទេសរាប់សិបនាក់ជាប់គាំងនៅតំបន់ភ្នំហិម៉ាឡៃ បន្ទាប់ពីទឹកជំនន់បានផ្តាច់ទំនាក់ទំនងផ្លូវថ្នល់។ ទឹកជំនន់ និងការរអិលបាក់ដីជារឿងធម្មតា ហើយបណ្តាលឱ្យមានការបំផ្លិចបំផ្លាញយ៉ាងទូលំទូលាយក្នុងអំឡុងរដូវខ្យល់មូសុងរបស់ប្រទេសឥណ្ឌា ប៉ុន្តែអ្នកជំនាញនិយាយថា ការប្រែប្រួលអាកាសធាតុកំពុងបង្កើនភាពញឹកញាប់ និងហានិភ័យដល់មនុស្សនៅទូទាំងសកលលោក។ភ្លៀងធ្លាក់ខ្លាំងបានបោកបក់រថយន្ត បំផ្លាញអគារ និងបាក់ស្ពាននៅរដ្ឋ Himachal Pradesh ដែលជារដ្ឋដែលរងផលប៉ះពាល់ខ្លាំងបំផុត។ លោក Onkar Sharma ប្រធានទីភ្នាក់ងារគ្រោះមហន្តរាយរដ្ឋបាននិយាយថា យ៉ាងហោចណាស់មនុស្ស ៣៣ នាក់បានបាត់បង់ជីវិត។
មេប៉ូលីសរដ្ឋ Satwant Atwal បានប្រាប់ AFP ថា ក្រុមជួយសង្គ្រោះត្រូវបានចល័តដើម្បីជួយអ្នកធ្វើដំណើរបរទេសចំនួន ៤០ នាក់ ក្នុងនោះមានជនជាតិរុស្ស៊ី ១៤ នាក់ និង ម៉ាឡេស៊ី ១២ នាក់ ដែលជាប់គាំងនៅគោលដៅទេសចរណ៍ជាមួយជនជាតិឥណ្ឌាជាច្រើនរយនាក់។
នាយករដ្ឋមន្រ្តីឥណ្ឌាលោក Sukhvinder Singh Sukhu បាននិយាយកាលពីថ្ងៃពុធនៅលើ Twitter ថា ដោយសារតែព្រិលធ្លាក់ខ្លាំង និងអាកាសធាតុអាក្រក់ វាបានក្លាយជាការលំបាកខ្លាំងណាស់ក្នុងការជម្លៀសពួកគេចេញពីតំបន់រងគ្រោះ ។ រដ្ឋធានីញូវដែលីក៏ត្រូវបានដាក់ឱ្យមានការប្រុងប្រយ័ត្នខ្ពស់ចំពោះទឹកជំនន់បន្ទាប់ពីទន្លេ Yamuna បានកត់ត្រាកម្រិតខ្ពស់បំផុតចាប់តាំងពីឆ្នាំ ១៩៥៨៕
