ភ្នំពេញ៖ ក្រសួងកសិកម្ម កាលពីសប្ដាហ៍មុន បានប្រទះឃើញកូនផ្សោតថ្មីមួយទៀត ដោយត្រូវបានក្រុមអ្នកស្រាវជ្រាវនៃខណ្ឌរដ្ឋបាលជលផលក្រចេះ និងស្ទឹងត្រែង រដ្ឋបាលជលផល និងអង្គការ WWF បានប្រទះឃើញនិងកត់ត្រាកូនផ្សោតថ្មីមួយបន្ថែម ដែលស្ថិតនៅអន្លង់កាំពី ភូមិកាំពី ឃុំសំបុក ស្រុកចិត្របុរី ខេត្តក្រចេះ។
បើយោងតាមក្រសួងកសិកម្ម បានទទួលព័ត៌មានពីក្រុមសហគមន៍អ្នកចម្លងទូកទេសចរណ៍ និងក្រុមឆ្នាំទន្លេប្រចាំអន្លង់កាំពី បានចុះថតបានកូនផ្សោត នៅចំណុចអន្ទង់វៀន នៃអន្លង់កាំពី បានផ្ដល់ព័ត៌មានថា កូនផ្សោតទើបកើតថ្មីនេះមានអាយុប្រមាណ១០ថ្ងៃកំពុងហែលជាមួយផ្សោតពេញវ័យចំនួន ០៩ក្បាលផ្សេងទៀត។ ហើយកូនផ្សោតនេះត្រូវបានការកត់ត្រាជាកូនផ្សោតថ្មី និងជាកូនផ្សោតទី០៥ហើយ ដែលត្រូវបានកត់ត្រាចាប់តាំងពីខែមករា ដល់ខែកក្កដា ឆ្នាំ២០២៣នេះ ។
គួរបញ្ជាក់ថា នៅឆ្នាំ២០២២ ក្រុមការងារបានកត់ត្រាកូនផ្សោតបានចំនួន០៦ក្បាល និង នៅឆ្នាំ២០២១ ក្រុមនិងអង្គការ WWF បានកត់ត្រាកូនផ្សោតបានចំនួន០៦ក្បាលផងដែរ៕
