ភ្នំពេញ៖ សម្តេច ហ៊ុន សែន នៅព្រឹកថ្ងៃទី០៧កក្កដានេះ បានស្នើឲ្យអ្នកលេងបណ្តាញ TikTok ដែលប្រើប្រាស់ឈ្មោះសម្តេចទាំងអស់លុបចោលទាំងស្រុង បើមិនដូច្នេះនឹងប្រើវិធានការច្បាប់ដោយមិនអាចលើកលែងបានទេ។ នេះបើតាមសារសម្លេងរបស់សម្តេច ហ៊ុន សែន តាមរយៈបណ្តាញតេឡេក្រាម។
សម្តេច ហ៊ុន សែន បានថ្លែងស្នើឲ្យអ្នកលេងបណ្តាញ TikTok ដែលប្រើប្រាស់ឈ្មោះសម្តេចទាំងអស់លុបចោលទាំងស្រុង ព្រោះវានឹងបង្កើតឲ្យមានការភាន់ច្រឡំមួយយ៉ាងធំ ដូច្នេះស្នើឲ្យជំនួយការផ្ទាល់របស់សម្តេច ធ្វើការបន្ទាន់ជាមួយក្រុមហ៊ុន TikTok ក៏ដូចជាបងប្អូនដែលទទួលបាននូវសារសម្លេងរបស់សម្តេចតាមរយៈតេឡេក្រាម។
សម្តេច ហ៊ុន សែន បានបញ្ជាក់ដោយស្នើឲ្យលុបគណនីTikTok ប្រើប្រាស់ឈ្មោះសម្តេចទាំងអស់លុបជាបន្ទាន់ ហើយធ្វើនៅថ្ងៃនេះដោយមិនរងចាំថ្ងៃណាទេ បើមិនដូច្នេះនឹងប្រើវិធានការច្បាប់ដោយមិនអាចលើកលែងបានទេ ព្រោះវាអាចនឹងមានការយល់ខុសនៅពេលដែលបង្ហោះសារ និងបង្ហោះរូបភាពចេញទៅតាមរយៈគណនីដែលប្រើឈ្មោះសម្តេច ហ៊ុន សែន។
សម្តេច ហ៊ុន សែន បានគូសបញ្ជាក់ថា អ្នកដែលមិនអាចដូរឈ្មោះបានត្រូវលុបចោល រីឯអ្នកដែលមិនចង់លុបត្រូវដូរឈ្មោះចេញមិនអាចដាក់ឈ្មោះសម្តេច ហ៊ុន សែន សូម្បីតែ សម្តេច ហ៊ុន សែន ហ្វេន ក៏ត្រូវលុបចោលដែរ៕
