ប្រទះឃើញកូនផ្សោតទី៤ ក្នុងឆ្នាំ២០២៣ នៅក្រចេះ

ក្រចេះ៖ ក្រុមស្រាវជ្រាវនៃខណ្ឌរដ្ឋបាលជលផលខេត្តក្រចេះ និងស្ទឹងត្រែង រដ្ឋបាលជលផល និងអង្គការ WWF បានកត់ត្រាកូនផ្សោតថ្មីមួយ បន្ទាប់ពីទទួលបានព័ត៌មានពីឆ្មាំទន្លេប្រចាំការនៅអន្លង់កាំពី ខេត្តក្រចេះ កាលពីថ្ងៃទី១៥ មិថុនា។

កូនផ្សោតនេះ ត្រូវបានប្រទះឃើញ តាមរយៈរូបថតដែលថតបាន នៅម៉ោង១៣:៣០នាទីរសៀល នាថ្ងៃទី១៥ ខែមិថុនា ឆ្នាំ២០២៣ នៅចំណុចអន្ទង់វៀននៃអន្លង់កាំពី ភូមិកាំពី ឃុំសំបុក្រ ស្រុកចិត្របុរី ខេត្តក្រចេះ។

បើតាមអង្គការ WWF កូនផ្សោតទើបកើតថ្មីនេះ មានអាយុប្រមាណ០៥ថ្ងៃ កំពុងហែលជាមួយផ្សោតពេញវ័យចំនួន៥ក្បាលទៀត។ ជាការកត់សម្គាល់ នេះជាកូនផ្សោតទី៤ហើយ ដែលបានកត់ត្រាចាប់តាំងពីខែមករា ដល់ខែមិថុនា ឆ្នាំ២០២៣។

គួរបញ្ជាក់ថា ក្នុងឆ្នាំ២០២២ អង្គការ WWF បានកត់ត្រាកូនផ្សោតបានចំនួន៦ក្បាល និងនៅឆ្នាំ២០២១ បានកត់ត្រាកូនផ្សោតបានចំនួន៦ក្បាល៕