ភ្នំពេញ៖ កម្ពុជា និងអង់គ្លេស កាលពីថ្ងៃទី១៥ មិថុនា បានចុះហត្ថលេខាលើអនុស្សរណៈនៃការយោគយល់គ្នា (MoU) ស្តីពីការដាក់ឱ្យដំណើរការជាផ្លូវការនៃកិច្ចសហប្រតិបត្តិការ ក្នុងការអនុវត្តមូលនិធិតំបន់ទេសភាពជីវៈចម្រុះ (BLF) នៅកម្ពុជា។
លោក Marc Thayre ភារ:ធារីនៃស្ថានទូតអង់គ្លេសប្រចាំកម្ពុជា បានលើកឡើងថា ផលប៉ះពាល់នៃការប្រែប្រួលអាកាសធាតុ មិនគោរពព្រំដែនទេ ហើយភាពជាដៃគូរឹងមាំ គឺមានសារៈសំខាន់ក្នុងការការពារបរិស្ថាន។ លោក Marc Thayre បានបន្ថែមថា មូលនិធិតំបន់ទេសភាពជីវៈចម្រុះ នឹងក្លាយជាយន្តការដ៏សំខាន់មួយក្នុងការគាំទ្រ សហគមន៍មូលដ្ឋាន ដើម្បីពង្រឹងការអភិរក្សជីវចម្រុះ កាត់បន្ថយភាពក្រីក្រ និងកសាងភាពធន់នឹងការប្រែប្រួលអាកាសធាតុ។
ក្នុងឱកាសនោះ លោក ជា សំអាង រដ្ឋលេខាធិការក្រសួងបរិស្ថាន បានថ្លែងថា ការលើកកម្ពស់ជីវភាពសហគមន៍មូលដ្ឋាន គឺជាអាទិភាពមួយ ក្នុងចំណោមអាទិភាពចម្បង របស់រាជរដ្ឋាភិបាល កម្ពុជា ទន្ទឹមនឹងការគ្រប់គ្រងធនធានធម្មជាតិ និងការអភិរក្សជីវៈចម្រុះ សម្រាប់ការអភិវឌ្ឍដោយចីរភាព។ គម្រោង BLF នឹងគាំទ្រដល់ការគ្រប់គ្រង ប្រកបដោយប្រសិទ្ធភាព និងនិរន្តរភាព នៃការអភិរក្សជីវៈចម្រុះ និងការពង្រឹងជីវភាពរស់នៅ របស់ប្រជាពលរដ្ឋ នៅក្នុងតំបន់គោលដៅ តាមរយៈការចុះបញ្ជី និងកំណត់តំបន់ការពារធម្មជាតិ ព្រមទាំងហិរញ្ញវត្ថុបៃតង ការកសាងសមត្ថភាព និងការអប់រំបរិស្ថាន។
គួរបញ្ជាក់ថា មូលនិធិតំបន់ទេសភាពជីវៈចម្រុះ BLF នឹងផ្តល់ថវិការហូតដល់ ១៥ លានផោន សម្រាប់អនុវត្តសកម្មភាព នៅរវាងពីឆ្នាំ២០២៣ ដល់ឆ្នាំ២០២៩ នៅក្នុងតំបន់ទេសភាពមេគង្គក្រោម តាមទីតាំងមួយចំនួននៅកម្ពុជា ឡាវ និងវៀតណាម។ តំបន់ទេសភាពមេគង្គក្រោម គឺជាតំបន់មួយសម្បូរធនធានជីវៈចម្រុះ ដែលមានសារៈសំខាន់ជាអន្តរជាតិ ផ្នែកធនធានជីវៈចម្រុះ សក្តានុពលក្នុងការបំពេញមុខងារជាអាងស្រូបកាបូន តម្រូវការសេដ្ឋកិច្ច និងជីវភាពរស់នៅរបស់ប្រជាជនក្នុងតំបន់៕
.png?1702006401)
