ចិន៖ កីឡាករ Lionel Messi ដែលជាខ្សែប្រយុទ្ធក្លឹប PSG (Paris Saint-Germain F.C) ដែលវ័យមានជាង ៣៥ ឆ្នាំហើយបច្ចុប្បន្ន ត្រូវបានប៉ូលិសចិនឃាត់ខ្លួននៅអាកាសយានដ្ឋានប៉េកាំង កាលពីថ្ងៃទី ១០ ខែមិថុនា បន្ទាប់ពីមានការយល់ច្រឡំទាក់ទងនឹងលិខិតឆ្លងដែន។
បើយោងតាមប្រព័ន្ធផ្សព្វផ្សាយចិនបានឲ្យដឹងថា កីឡាករវ័យ ៣៥ឆ្នាំ សញ្ជាតិអាហ្សង់ទីនរបស់ក្លិបបាល់ទាត់ PSG (Paris Saint-Germain F.C) បានធ្វើដំណើរទៅកាន់ប្រទេសចិន ដើម្បីប្រកួតជាមួយអូស្ត្រាលីនៅកីឡដ្ឋាន Workers Stadium នៅថ្ងៃទី ១៥ ខែមិថុនា តែត្រូវបានប៉ូលិសចិនឃាត់ខ្លួននៅអាកាសយានដ្ឋានប៉េកាំង ដោយសារតែមានបញ្ហាមួយចំនួនពាក់ព័ន្ធទៅនឹងវីសា (Visa)របស់លោក។ បញ្ហាដែលឈានដល់ការឃាត់ខ្លួន Messi ដោយសារតែលោកកំពុងកាន់នូវលិខិតឆ្លងដែនរបស់អេស្ប៉ាញ ជំនួសឱ្យលិខិតឆ្លងដែនអាហ្សង់ទីន ដោយគ្មានទិដ្ឋាការចិនត្រឹមត្រូវ។ ហើយបញ្ហានេះត្រូវបានអាជ្ញាធរចិន បានរៀបចំដោះស្រាយបញ្ហានេះភ្លាមៗក្នុងរយៈពេលត្រឹមតែ ៣០ នាទីប៉ុណ្ណោះ នឹងបានអនុញ្ញាតឱ្យ Messiបន្តដំណើរហួសពីអាកាសយានដ្ឋាន។
គួរបញ្ជាក់ថាកីឡាករបាល់ទាត់អាហ្សង់ទីនរូបនេះបានសម្រេចចិត្តចាកចេញពីក្រុង PSG ទៅលេងឲ្យ Inter Miami តែប៉ុន្មានខែក្រោយពីឈ្នះ FIFA World Cup 2023 នៅប្រទេសកាតា។ បច្ចុប្បន្ន Messi កំពុងសម្រាកមុនពេលចាប់ផ្តើមជំពូកថ្មីនៃជីវិតរបស់លោកជាមួយក្រុមថ្មី Inter Miami ដែលជាក្រុម Major League Soccer (MLS) ដែលគ្រប់គ្រងដោយ David Beckham នៅទីក្រុង Miami៕
