ភ្នំពេញ៖ អគារបៃតង ជាអគារដែលកាត់បន្ថយឬលុបបំបាត់ផលប៉ះពាល់អវិជ្ជមានក្នុងការរចនា ការសាងសង់ ឬប្រតិបត្តិការ ហើយមានឥទ្ធិពលវិជ្ជមានទៅលើអាកាសធាតុនិងបរិស្ថានធម្មជាតិ។ អគារបៃតង ត្រូវអនុវត្តនៅលើ គុណភាពអគារទាំងអស់ មិនថាជាអគារស្នាក់នៅ អគារការិយាល័យ អគារសាលារៀន មន្ទីរពេទ្យ និងសំណង់ផ្សេងៗ ទៀតនោះទេ។
អគារបៃតង ជួយកាត់បន្ថយប្រភពបំពុល អត្រាខ្យល់ចេញចូលប្រសើរជាងមុនដែលអាចជួយកាត់បន្ថយមេរោគក្នុងអគារ និងអភិរក្សធនធានធម្មជាតិ។ ពិសេសអគារបៃតង ផ្តល់នូវគុណប្រយោជន៍ ដល់បរិយាកាសខាងក្នុង អាចបង្កើនផលិតភាពការងារ សុខភាព និងសុខុមាលភាពដល់អ្នករស់នៅ ហើយបង្កើនប្រសិទ្ធភាពការរស់នៅ និងមានអត្ថប្រយោជន៍សម្រាប់អាជីវកម្មផងដែរ។
លើសពីនេះ លក្ខណៈសម្បត្តិនៃអគារបៃតងនីមួយៗ មិនមែនត្រូវតែដូចគ្នា ទាំងស្រុងនោះទេ វាអាចខុសគ្នាទៅតាមប្រទេសឬតំបន់ អាស្រ័យទៅលើលក្ខខណ្ឌអាកាសធាតុ វប្បធម៌និងប្រពៃណីប្លែកពីគ្នា ប្រភេទនៃអគារប្រើប្រាស់ បរិស្ថានតូចឬក៏ធំទូលាយ អាយុកាលប្រើប្រាស់ អាទិភាពសេដ្ឋកិច្ច និងសង្គមជាដើម៕
