ក្រសួងប្រៃសណីយ៍លើកទឹកចិត្តឲ្យសិស្សចូលរួមប្រកួត«បញ្ញវ័នឌីជីថល»ដើម្បីពង្រីកសកក្ដានុពលខ្លួន

ភ្នំពេញ៖ រដ្ឋមន្ត្រីក្រសួងប្រៃសណីយ៍និងទូរគមនាគមន៍ លើកទឹកចិត្តដល់សិស្សានុសិស្សចូលរួមដាក់ពាក្យចូលរួមប្រកួតនៅក្នុងកម្មវិធីប្រកួតប្រជែង «បញ្ញវ័នឌីជីថល - Digital Talents» ដើម្បីបង្ហាញទេពកោសល្យ និងពង្រីកសកក្ដានុពលរបស់ខ្លួន។ នេះបើតាមប្រសាសន៍លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ ថ្លែងក្នុងពិធីប្រកាសផ្លូវការ កម្មវិធី បញ្ញវ័នឌីជីថល - Digital Talents នៅថ្ងៃទី២ ឧសភា នេះ។

ថ្លែងនៅក្នុងពិធីបើកនាឱកាសនោះលោក ជា វ៉ាន់ដេត បានលើកទឹកចិត្តដល់សិស្សានុសិស្សទាំងអស់ចូលរួមដាក់ពាក្យនៅក្នុងកម្មវិធីប្រកួតប្រជែងកម្មវិធីបញ្ញវ័នឌីជីថល ដើម្បីបង្ហាញទេពកោសល្យ និងពង្រីកសកក្ដានុពលរបស់ខ្លួន។ លោក បានប្រកាសថា សិស្សានុសិស្សដែលទទួលបានជ័យលាភីលេខ១ ទទួលបានទឹកប្រាក់ ១៥លានរៀល ជ័យលាភីលេខ២ ទទួលបានទឹកប្រាក់ ១០លានរៀល និងជ័យលាភីលេខ៣ ទទួលបានទឹកប្រាក់ ៥លានរៀល ព្រមទាំងទទួលបានអាហារូបករណ៍សិក្សាថ្នាក់បរិញ្ញាបត្រ និងឱកាសទៅទស្សនកិច្ចសិក្សាជាមួយក្រុមហ៊ុនបច្ចេកវិទ្យានៅក្រៅប្រទេស។ ដោយឡែកជ័យលាភីលេខ៤ ដល់លេខ២០ ទទួលបានកុំព្យូទ័រយួរដៃ ១គឿង និងប្រាក់ឧបត្ថមផងដែរ។

លោក ជា វ៉ាន់ដេត បានមានប្រសាសន៍ថា កម្មវិធីបញ្ញវន្តឌីជីថលនេះ នឹងជួយលើកកម្ពស់កសាងធនធានមនុស្សឆ្នើមរបស់កម្ពុជាយើង ជាពិសេសការជំរុញដល់សិស្សានុសិស្សថ្នាក់វិទ្យាល័យអាចស្វែងយល់ពីការប្រើប្រាស់បច្ចេកវិទ្យាឌីជីថលតាមរយៈការចូលរួមប្រកួតប្រជែង និងទទួលបានការហ្វឹកហាត់ពីអ្នកជំនាញ។ 

គួរបញ្ជាក់ថា កម្មវិធីបញ្ញវន្តឌីជីថល ជាកម្មវិធីអប់រំកំសាន្ត ផលិតដោយ ក.ប.ទ. និងមានការគាំទ្រដោយក្រសួងអប់រំ ព្រមទាំងដៃគូសហការឧបត្ថមកម្មវិធីរួមមាន បណ្ឌិត្យសភាបច្ចេកវិទ្យាឌីជីថលកម្ពុជា សាកលវិទ្យាល័យអាមេរិកាំងភ្នំពេញ ក្រុមហ៊ុន Smart Axiata គ្រឹះស្ថានមីក្រូហិរញ្ញវត្ថុអម្រឹត ក្រុមហ៊ុន Huawei Cambodia។ កម្មវិធីនេះ ចាប់ផ្តើមទទួលពាក្យរបស់បេក្ខជនដែលកំពុងសិក្សាពីថ្នាក់ទី១០ ដល់ទី១២ ទូទាំងប្រទេសកម្ពុជា ដែលចាប់ផ្តើមជ្រើសរើសខេត្តចំនួន៦ ដូចជា រាជធានីភ្នំពេញ ខេត្តបាត់ដំបង ខេត្តសៀមរាប ខេត្តកំពង់ចាម ខេត្តតាកែវ និងខេត្តកណ្តាល ចាប់ពីថ្ងៃទី២ ខែមិថុនា ឆ្នាំ២០២៣ និងបិទទទួលពាក្យនៅថ្ងៃទី១៩ ខែមិថុនា ឆ្នាំ២០២៣៕