ភ្នំពេញ៖ យុទ្ធនាការ BeyondTheGames នឹងរៀបចំកម្មវិធីអបអរសាទរភាពជាម្ចាស់ផ្ទះរបស់កម្ពុជា ក្នុងព្រឹតិ្តការណ៍កីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ និងបង្ហាញភាសាបេះដូងសម្រាប់កម្ពុជា តាមរយៈការស្រឡាញ់គាំទ្រអត្តពលិកខ្មែរគ្រប់ៗរូប ប្រកបដោយមោទកភាពលើសពីការប្រកួត។ បន្ថែមនេះក៏មានការរៀបចំសកម្មភាពកម្សាន្តចូលរួមដោយសេរី នៅថ្ងៃទី២៨មេសា ដែលធ្វើឡើងនៅវិមានឈ្នះ ឈ្នះ ចាប់ពីម៉ោង ៤រសៀលតទៅ។
នៅក្នុងថ្ងៃជួបជុំដ៏ពិសេសនេះ យុទ្ធនាការ BeyondTheGames នឹងរៀបចំកម្មវិធីអម និងសកម្មភាពសប្បាយៗជាច្រើន ដូចជា ការប្រគំតន្រ្តីពីសំណាក់តារាចម្រៀងជាតិ និងអន្តរជាតិល្បីជាច្រើនរូប, ស្ដង់ពិព័រណ៍ផលិតផលជាច្រើនប្រភេទ, សួនបេះដូង, ការតាំងបង្ហាញគំនូរអាស៊ាន, ការតាំងបង្ហាញស្នាដៃគំនូរកុមារ។
សូមជម្រាបថា កម្ពុជានឹងធ្វើជាម្ចាស់ផ្ទះនៃការរៀបចំព្រឹតិ្តការណ៍កីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលប្រព្រឹត្តទៅនៅថ្ងៃទី០៥ ខែឧសភា ឆ្នាំ២០២៣ ពោលនៅសល់តែ ១០ថ្ងៃទៀតប៉ុណ្ណោះ នឹងឆ្ពោះទៅកាន់ការចាប់ផ្ដើមនៃព្រឹត្តិការណ៍ស៊ីហ្គេមលើកទី៣២៕
