ភ្នំពេញ៖ គិតចាប់ពីថ្ងៃទី០១ ខែមេសា ឆ្នាំ២០២៣ មកដល់ថ្ងៃទី១១ ខែមេសា ឆ្នាំ២០២៣ មានពលរដ្ឋខ្មែរវិលត្រលប់ចូលប្រទេសវិញ មានប្រមាណជាង២ម៉ឺននាក់ដែលភាគច្រើនជាពលករដែលបម្រើការងារក្នុងប្រទេសថៃ ខណៈក្រុមអាជ្ញាធរកម្ពុជាកំពុងជួយសម្រួលដល់បែបបទចូលប្រទេស។នេះបើយោងតាមរបាយការណ៍របស់អគ្គនាយកដ្ឋានអន្តោប្រវេសន៍ ផ្តល់ជូនដល់សារព័ត៌មាន ស៊ីស៊ីថាមស៍ នៅថ្ងៃទី ១២ មេសានេះ។
នាយឧត្តមសេនីយ៍ កែវ វណ្ណថន អគ្គនាយករង និងជាអ្នកនាំពាក្យនៃអគ្គនាយកដ្ឋានអន្តោប្រវេសន៍ បានថ្លែងប្រាប់ស៊ីស៊ីថាមស៍ បន្ថែមទៀត គិតចាប់ពីថ្ងៃទី០១ ខែមេសា ឆ្នាំ២០២៣ មកដល់ថ្ងៃទី១១ ខែមេសា ឆ្នាំ២០២៣ មានពលរដ្ឋខ្មែរវិលត្រលប់ចូលប្រទេសវិញចំនួន ២២,១៧៦នាក់ ដោយភាគច្រើនចូលមកតាមច្រកទ្វារព្រំដែនអន្តរជាតិកម្ពុជា-ថៃ។
បើតាមនាយឧត្តមសេនីយ៍ កែវ វណ្ណថន ដើម្បីជួយសម្រួលដល់ប្រជាពលរដ្ឋវិលចូលប្រទេសវិញ អាជ្ញាធរកម្ពុជា បានជួយសម្រួលពន្លឿនដល់ការធ្វើបែបបទចូលប្រទេសឱ្យមានភាពឆាប់រហ័ស។ការវិលចូលប្រទេសកម្ពុជាវិញពេលនេះ គឺធ្វើឡើងស្របពេលដែលប្រទេសកម្ពុជា ត្រៀមរៀបចំពិធីបុណ្យចូលឆ្នាំថ្មីប្រពៃណីជាតិខ្មែរដែលនឹងចូលមកដល់នៅថ្ងៃទី ១៤ មេសា ឆ្នាំ២០២៣ខាងមុខនេះ។
អាជ្ញាធរខេត្តបន្ទាយមានជ័យ បានអះអាងថា ការវិលត្រឡប់ចេញពីប្រទេសថៃរបស់ពលករខ្មែររយៈពេលប៉ុន្មានថ្ងៃជាប់ៗគ្នានេះ ភាគច្រើនមានប៉ាស្ទ័រស្ទើ, បណ្ណស្នាក់នៅ និង Border Pass ទាំងអស់គ្នា ហើយពលករទាំងអស់នេះ កំពុងអង្គុយចាំវៃប៉ាស្ទ័រ និង Border Pass ដើម្បីវិលចូលមកស្រុកកំណើតវិញ។
ពលរដ្ឋខ្មែរមកពីប្រទេសថៃ អាជ្ញាធរខេត្ត បានប្រមូលពួកគាត់ឲ្យនៅក្នុងមណ្ឌលសំចតមួយរយៈ ដើម្បីរង់ចាំត្រួតពិនិត្យលើបញ្ហាសុខភាពពីសំណាក់លោកគ្រូពេទ្យសិន មិនឲ្យធ្វើដំណើរផ្ដេសផ្ដាសនោះឡើយ ព្រោះខ្លាចពួកគាត់ផ្ទុកនូវមេរោគកូវីដ យកទៅចម្លងដល់ក្រុមគ្រួសារ ដែលនៅឯស្រុកកំណើតរបស់ខ្លួន៕
