ចិននិងជប៉ុនជួបគ្នាពិភាក្សាពីកង្វល់ដែនសមុទ្រតៃវ៉ាន់

តូក្យូ៖ មន្ត្រីជាន់ខ្ពស់រដ្ឋាភិបាលជប៉ុន និងចិនបានជួបប្រជុំគ្នាកាលគ្នានាថ្ងៃច័ន្ទនេះ ដើម្បីពិភាក្សាអំពីការព្រួយបារម្ភអំពីដែនសមុទ្រនៅក្នុងដែនទឹកដែលមានជម្លោះនៅសមុទ្រចិនខាងកើត ខណៈដែលទីក្រុងប៉េកាំងកំពុងតែធ្វើសមយុទ្ធក្នុងដែកសមុទ្រនៃកោះតៃវ៉ាន់។ នាវាចម្បាំងរបស់ចិនបានក្លែងធ្វើការវាយប្រហារប្រឆាំងនឹងតៃវ៉ាន់ បន្ទាប់ពីប្រធានាធិបតីតៃវ៉ាន់លោកស្រី Tsai Ing-wen បានទៅបំពេញទស្សនកិច្ចនៅសហរដ្ឋអាម៉េរិក និងបានជួបជាមួយប្រធានសភាអាម៉េរិកលោក Kevin McCarthy ។

មុនពេលកិច្ចពិភាក្សានេះ លោក Hong Liang ប្រធានគណៈប្រតិភូចិន បាននិយាយថា លោកកំពុងស្វែងរកកិច្ចសហប្រតិបត្តិការនៅក្នុងតំបន់ដែនសមុទ្រជាមួយប្រទេសជប៉ុន ហើយរំពឹងថានឹងមាន "ការសន្ទនាស៊ីជម្រៅ" ជាមួយសមភាគីរបស់គាត់។ អ្នកនាំពាក្យរដ្ឋាភិបាលជប៉ុនកំពូលម្នាក់បាននិយាយថា ជប៉ុនបានតាមដានសមយុទ្ធយោធារបស់ចិនជុំវិញកោះតៃវ៉ាន់ជាប់លាប់ និងមានការចាប់អារម្មណ៍យ៉ាងខ្លាំង។

ប្រមុខខុទ្ទកាល័យលោក Hirokazu Matsuno បានប្រាប់អ្នកយកព័ត៌មានថា "សារៈសំខាន់នៃសន្តិភាព និងស្ថិរភាពនៅច្រកសមុទ្រតៃវ៉ាន់មិនត្រឹមតែមានសារៈសំខាន់សម្រាប់សន្តិសុខរបស់ប្រទេសជប៉ុនប៉ុណ្ណោះទេ ប៉ុន្តែក៏សម្រាប់ស្ថិរភាពនៃសហគមន៍អន្តរជាតិទាំងមូលផងដែរ" ។

ទីក្រុងប៉េកាំង ដែលចាត់ទុកតៃវ៉ាន់ជាផ្នែកមួយរបស់ចិន បានចាត់ទុកកិច្ចប្រជុំរវាងមន្ត្រីជាន់ខ្ពស់អាម៉េរិក និងតៃវ៉ាន់ថាជាការជ្រៀតជ្រែកក្នុងកិច្ចការផ្ទៃក្នុងរបស់ខ្លួន។

នៅក្នុងកិច្ចប្រជុំចុងក្រោយកាលពីខែវិច្ឆិកា លោក Hong បានរិះគន់ទីក្រុងតូក្យូចំពោះការអត្ថាធិប្បាយអំពីសកម្មភាពរបស់ចិននៅច្រកសមុទ្រតៃវ៉ាន់ដែលមានបំណងគាំទ្រការបំបែកកោះនេះចេញពីដីគោក។ លោកក៏បានស្នើឱ្យជប៉ុនដកកប៉ាល់របស់ខ្លួនត្រឡប់មកវិញពីសមុទ្រជុំវិញកោះនានាក្នុងសមុទ្រចិនខាងកើតដែលប្រទេសទាំងពីរទាមទារ។

នាវាឆ្មាំឆ្នេរសមុទ្រនៃប្រទេសទាំងពីរប្រឈមមុខដាក់គ្នាជាប្រចាំនៅក្នុងដែនទឹកជុំវិញកោះដែលគ្រប់គ្រងដោយជប៉ុន ដែលត្រូវបានគេស្គាល់នៅក្នុងប្រទេសជប៉ុនថាជាកោះ Senkaku និងនៅក្នុងប្រទេសចិនថាជាកោះ Diaoyu៕